Largohen xhudistët, kthehen rezultatet e zbehta për Kosovën

Xhudistët e Kosovës të shtunën janë larguar nga Orani i Algjerisë, ku po mbahen Lojërat Mesdhetare. Dhe me largimin e tyre janë kthyer edhe rezultatet e zbehta për sportistët kosovarë në ngjarjen shumësportëshe. Me pak përjashtime, rezultatet ishin të zbehta edhe para se xhudistët të nisnin garimin, të mërkurën e kaluar.

Xhudistët prej të mërkurës e deri të premten i fituan pesë medalje, prej tyre tri të arta. Një medalje të bronztë e fitoi boksieri Shpejtim Bajoku, ndërsa garat e të tjerave përfunduan kryesisht me rezultate për t’u harruar.

Rezultate të zbehta ka pasur nga e mërkura deri të premten, por ato mbetën në hije të shkëlqimit të xhudistëve.

Tashmë garën e kanë përfunduar shumica e 39 sportistëve pjesëmarrës nga Kosova. Të dielën garuan tre prej tyre, dy atletë e një taekwondist.

Atletja Gresa Bakraçi kishte udhëtuar me shpresa të mëdha, por nga Orani i Algjerisë do të largohet me rezultat jo të pritur. Ajo të dielën mbrëma u rendit vetëm e parafundit në vrapimin 1500 metra. Në garë ishin 11 atlete, ndërsa Bakraçi u rendit e dhjeta. Kishte kohë prej 4:27.76 minuta. E fundit ishte Abir Reffas e Algjerisë me kohë prej 4:28.97 minuta. Ndërkohë e nënta ishte algjeriania tjetër Amina Bettiche. Ajo kishte kohë prej 4:18.55 minuta. Pra, gati dhjetë sekonda ishte më e shpejtë se Bakraçi.

Edhe Sport 3 kor 2022 Bakraçi, vetëm e parafundit në Lojërat Mesdhetare

Bakraçi, aktualisht atletja më e mirë në vend, nuk e ka arritur as rekordin personal. Rezultatin më të mirë, që e ka arritur këtë vit, e ka 4:20.56 minuta. Vrapimin në 1500 metra e fitoi francezja Aurore Fleury me kohë prej 4:13.03 minuta. Federica del Buono ishte e dyta me kohë 4:13.09 minuta. Ndërkohë medalja e bronztë i takon italianes tjetër Ludovica Cavalli. Koha e saj ishte 4:13.37 minuta.

Gresa Bakraçi këtë vit ka vendosur disa rekorde dhe pritjet i kishte të mëdha për garën në Lojëra Mesdhetare. Ajo, megjithatë, ishte larg përfshirjes në luftë për medalje.

Edhe më keq kaloi atleti Alaudin Suma. Ai ka mbetur i fundit në hedhje të diskut. Sumapo ashtu garoi të dielën mbrëma dhe kishte hedhje larg prej atyre që kërkohen për të shmangur pozitat e fundit.

Në hedhje të diskut garuan 14 garues.

Suma hedhjen më të mirë e kishte 43.90 metra. Larg prej rekordit të tij të evidentuar, që është 48.90 metra. Këtë vit rezultati i tij më i mirë ishte 47.59 metra.

Suma fillimisht realizoi hedhje prej 43.90 metrash. Në tentimin e dytë disku shkoi 43.20 metra, ndërsa hedhja e tretë ishte edhe më e zbehtë, 42.13 metra. I parafundit (13) ishte maltezi Bradley Mifsud. Ai kishte rezultat prej 48.25 metrash. Ndërkohë i 12-ti ishte spanjolli Diego Casa Garrido me hedhjen më të mirë 54.80 metra.

20 metra më shumë se Suma diskun e ka hedhur qiprioti Apostolos Parellis. Ai fitoi të artën me rezultat prej 63.59 metra. Martin Markoviq i Kroacisë fitoi medaljen e argjendtë me rezultat prej 62.49 metra, ndërsa e bronzta i takoi malazezit Danijel Furtula me hedhjen më të mirë prej 61.74 metrash.

Paradite të dielën garoi taekwondisti Arbër Azemi. Ai në luftën e parë u mposht thellë 18:8 nga greku Konstantinos Chamalidis.

Edhe Sport 3 sht 2026 Rekord medaljesh por më pak të arta për Kosovën

Të shtunën, notarja Vanesa Beka garoi në 100 metra bretkosë. Ishte e fundit (6) në baterinë e parë me kohë prej 1:20.87 minuta. Për 12.03 sekonda ishte më e ngadaltë se fituesja e baterisë. Ajo ishte e fundit edhe prej të gjitha notareve që u paraqitën në kualifikime. Ishin 13 gjithsej.

Rezultate të ngjashme priten deri në fund të Lojërave Mesdhetare. Natyrisht, falë medaljeve të xhudos dhe boksierit Bajoku, ngjarja do të vlerësohet e suksesshme për Kosovën.