Përfaqësuesja e Kosovës është stërvitur të premten për herë të parë në stadiumin “Fadil Vokrri” në Prishtinë, që prej muajit mars. Por stërvitja e parë në prag të miqësoreve të qershorit u bë me shumë mungesa e disa fytyra të reja.
Gjithsej 20 futbollistë ishin të pranishëm në stërvitjen e parë, por pati mungesa.
Ibrahim Dresheviq i Heerenveenit mungoi shkaku i infektimit me koronavirus.
Mungesën e Dresheviqit në një mënyrë e plotësoi sulmuesi i Ballkanit, Mirlind Daku, që ishte golashënuesi më i mirë në Superligë për edicionin që përfundoi me 31 gola në total. Daku është ftuar të premten së bashku me Betim Halimin.
Bashkim Ajdini, që u ftua për herën e parë te Kosova, është i angazhuar me Osnabruckun, Astrit Selmani do ta luajë finalen e Kupës së Suedisë me Hammarbyn, ndërsa Arijanet Muriq është i sëmurë. Në vend të këtij të fundit është ftuar portieri i Olimpik Donetskut në Ukrainë, Betim Halimi.
Edhe
Mungesa të shumta në stërvitjen e parë të “Dardanëve”
Angazhim me ekipin ka edhe Herolind Shala në Norvegji me Stabaekun.
Fytyra të reja e rikthime te Kosova u panë po ashtu.
Risi nga lista e 23 futbollistëve të ftuar nga përzgjedhësi Bernard Challandes janë Lorik Emini i Luzernit në Zvicër, Destan Bajselmani i PEC Zwolles në Holandë dhe Blendi Idrizi i Schalkes. Që të tre ishin të pranishëm të premten.
Gjatë ditës, përzgjedhësi Bernard Challandes tha se ndeshjet miqësore do t’i shfrytëzojë më shumë për lojtarët e rinj.
Edhe
Kosova pa kapitenin Rrahmani e titullarë të tjerë, si dhe me tre emra të rinj
Te Kosova në listën për ndeshjet e qershorit munguan Edon Zhegrova, Benjamin Kololli, Florent Hadërgjonaj, Bersant Celina, Elbasan Rashani, Valon Berisha, Bernard Berisha e Florent Muslija.
Më 1 qershor, Kosova luan me San Marinon në Prishtinë. Tri ditë më vonë takohet me Maltën në duelin që zhvillohet në Austri. Dy ndeshjet e tjera do të luhen në Antalia të Turqisë. Më 8 qershor, Kosova do ta ketë përballë Guinenë, ndërsa më 11 qershor luan kundër Gambisë. Për këto dy ndeshje do të publikohet listë tjetër.
