Koreja e Veriut nuk merr pjesë në Lojërat Olimpike

Koreja e Veriut është bërë vendi i parë në botë që ka braktisur Lojërat Olimpike në Tokio për shkak të koronavirusit. Sipas autoriteteve koreane, kjo është bërë për t'i ruajtur lojtarët e saj nga "kriza botërore e shëndetit publik të shkaktuar nga koronavirusi".

Pandemia tashmë ka shtyrë garat olimpike, të cilat ishin planifikuar të mbaheshin në 2020-n dhe organizatorët kishin tentuar të vendosni masa parandaluese, si ndalimi i tifozëve për t'i ruajtur atletët dhe banorët, raporton AP.

Komiteti Olimpik i Japonisë tha të martën se Koreja e Veriut ende nuk e ka njoftuar atë se nuk do të marrë pjesë në Lojërat e Tokios.

Katsunobu Kato, sekretari kryesor i kabinetit të Japonisë, deklaroi se qeveria shpreson që shumë vende do të bashkohen në Lojërat Olimpike dhe ai premtoi masa të shumta anti-COVID.

Ministria e Unifikimit e Koresë së Jugut shprehu keqardhje për vendimin e Veriut, duke thënë se kishte shpresuar që Lojërat Olimpike të Tokios do të ofronin një mundësi për të përmirësuar marrëdhëniet ndër-koreane, të cilat kanë rënë mes një bllokimi në negociatat më të mëdha bërthamore midis Uashingtonit dhe Pyongyang.