Klubet belge shtyjnë votimin për të konfirmuar anulimin e edicionit

Klubet belge të futbollit të hënën kanë shtyrë votimin për të konfirmuar anulimin e edicionit. Votimi është shtyrë për javën e ardhshme, duke lënë të hapur derën për rifillim të edicionit, ka shkruar Reuters.

Pas një vendimi që u mor në fillim të muajit, 24 klubet e Pro Leagues është dashur të konfirmojnë përfundimin e parakohshëm të stinorit për shkak të pandemisë Covid – 19. Por vendimi është shtyrë.

Votimi do të bëhet më 4 maj, derisa sportistët në Belgjikë po presin më shumë qartësi për atë se a ka gjasë që të lehtësohen masat e izolimit.

“Klubet u mblodhën për të diskutuar për pasojat e koronavirusit dhe atyre iu dha informacion i detajuar në lidhje me situatën jashtëzakonisht komplekse që ka krijuar kriza. Shumica e klubeve janë pajtuar që të shtyhet vendimi për të përfunduar edicionin”, thuhet në një komunikatë të Pro Leagues.

Liga e Belgjikës ishte e para në Evropë që vendosi të anulojë pjesën e mbetur të edicionit. Vendimin e mori Bordi i Pro Leagues. Club Brugge pritej të fitonte titullin, por vendimi duhet të ratifikohet nga klubet. Vendimi për ratifikim është shtyrë dy herë.

UEFA kishte kundërshtuar vendimin e ligës belge për përfundim të hershëm të edicionit. Por më pas UEFA e ka lënë të hapur mundësinë që disa liga mos të vazhdojnë.