Kiana Kryeziu i afrohet normës për Lojërat Olimpike Dimërore

Skitarja Kiana Kryeziu i është afruar normës për pjesëmarrje në Lojërat Olimpike Dimërore. Kosova ende nuk ka pasur garuese në Lojërat Dimërore, ndërsa Kryeziu është në rrugë të mirë që të bëhet e para.

Është Komiteti Olimpik i Kosovës që ka njoftuar se Kiana Kryeziut i duhet vetëm edhe një rezultat i mirë për të siguruar normën për Lojërat Olimpike Dimërore që mbahen prej 4 deri më 20 shkurt në Pekin.

“Skitarja jonë përmbushi edhe kriterin e katërt për normë olimpike për Lojërat Olimpike Dimërore, Pekini 2022, disiplina e sllallomit të madh. Kiana fitoi 150.4 pikë të FIS-it në garën në Kronplatz të Italisë. I duhet edhe një rezultat nën 160 pikë për ta fituar normën olimpike. Afati për normë është deri më 16 janar”, ka njoftuar KOK-u.

Kiana Kryeziu është 17-vjeçare. Të enjten në Itali u rendit vetëm e 50-a, ndërsa dy lëshimet i përfunduan 52 skitare. Ajo kishte kohë prej 2:50.80 minuta, që i siguroi 150.74 pikë. Fakti se si rezultat për normë mjafton vendi i 50, dëshmon që norma për Lojërat Dimërore fitohet më lehtë se për Lojërat Olimpike Dimërore.

Kiana ishte për 18.03 sekonda më e ngadaltë se fituesja e garës në sllallom të madh në Kronplatz. Stella Johansson e SHBA-së doli fituese me kohë prej 2:32.77 minuta. 2.33.54 minuta ishte koha e amerikanes tjetër, Ava Sunshine Jemison. Celia Abad e Spanjës ishte e treta me kohë prej 2:33.59 minuta.

Dy lëshimet i përfundoi edhe Arba Pupovci. Ajo ishte e fundit prej garueseve me plasman, e 52-a. Koha e saj ishte 3:04.54 minuta. Arba ishte më 31.77 sekonda më e ngadaltë se fituesja.

Nëntë skitare nuk e përfunduan lëshimin e dytë, ndërsa pesë nuk e përfunduan lëshimin e parë. Kishte të diskualifikuara në të dy lëshimet e edhe të tilla që nuk startuan fare.

Edhe Sport 14 jan 2022 Kiana Kryeziu mundëson që Kosova me ekip më të kompletuar të udhëtojë në Pekin

“Lajme fantastike vijnë nga Përfaqësuesja e Kosovës që po merr pjesë në garat ndërkombëtare në Kronplatz të Italisë. Kiana Kryeziu ka arritur rezultatin e katërt, rezultat i cili e çon edhe një hap para drejt Olimpiadës. Tani mjafton vetëm edhe një rezultat i tillë dhe Kosova do të ketë përfaqësuesen e saj të parë në Lojërat Olimpike Dimërore. Rezultate shumë të mira në një konkurrencë të fortë tregoi edhe Arba Pupovci me 241 pikë të FIS”, ka njoftuar Federata Skitare e Kosovës. Federata nuk e ka përmendur plasmanin.

Sa më i mirë rezultati, numri i pikëve të FIS-it është më i vogël. Kianës i duhen pesë rezultate me më pak se 160 pikë për normë. Dy rezultate i ka arritur në muajin dhjetor në Kolashin të Malit të Zi. Dy rezultate tashmë i ka në Itali dhe i duhet edhe një në tri ditët e ardhshme për ta fituar normën.

Kosova tashmë e ka të sigurt pjesëmarrjen në Lojërat Olimpike me një skitar. Është thuajse e sigurt se në Pekin do të garojë Albin Tahiri.