Sulmuesi anglez Harry Kane pritet t’i mungojë Tottenhamit për kohë të gjatë pas lëndimit që e mori në ndeshjen e fundit kampionale kundër Southamptonit.
Tottenhami, të premten, nëpërmjet një njoftimi ka bërë të ditur se Kane ka dëmtuar ligamentet në gjurin e majtë dhe gjatë ditëve në vijim do të konfirmohet se për sa kohë do të mungojë, transmeton Koha Ditore.
Trajneri i Tottenhamit, Jose Mourinho pret që të jetë pa Kanen të paktën për dy muaj, që, sipas tij, do të jetë mungesë shumë e madhe për ekipin nga Londra.
“Stafi i mjekëve po vazhdon kontrollimet edhe pse kam ndjenjën se Kane do të mungojë për një kohë të gjatë. Ai mori lëndim të rëndë dhe për këtë arsye u largua nga ndeshja. Mungesa e tij në këtë kohë do të ndihet shumë tek ekipi ynë, duke pasur parasysh se Kane është lojtari kryesor”, është shprehur Mourinho.
Kane 26-vjeçar, këtë edicion ka shënuar 17 gola në 25 ndeshje për Tottenhamin në të gjitha garat.
Kane me këtë rast humb edhe derbin ndaj Liverpoolit, që zhvillohet më 11 janar.
