Hijeshia e sportit

Gazetari mitrovicas, Urall Boshnjaku, thotë se qyteti i tij jeton e frymon me basketbollin. Dhe vlerësimet e rrëfimin e tij zgjedh ta ndajë para palestrës që mban emrin Minatori, në nderim të minatorëve që do të dridhnin themelet e Jugosllavisë në fund të viteve tetëdhjetë kur paralajmëruan se Serbia e donte ish-federatën si Serbi të madhe. Sot, palestra e xehetarëve është kthyer në arenë gare e feste.

Veshur me fanellën e motër Tuanës, filloriste, Boshnjaku përmbledh kujtimet dhe dashurinë e gjyshit për basketbollin.

Sivjet, është fuqizuar edhe më shumë lidhja e mitrovicasve për klubin e tyre të zemrës, Trepça, që prin në serinë e finaleve të play offit me 2 me 1 me ndeshje ndaj Pejës. Ishte viti 2012 kur minatorët për herë të fundit fituan titullin e kampionit. 

Pjesë e ekipit të fundit kampion ishte edhe nënkryetari aktual i Komunës së Mitrovicës së Jugut, 29-vjeçari, Arian Tahiri, i cili para finales së tretë të së enjtes, ka veshur kastile xhemper me ngjyrat e skuadrës që dikur ia djersiti fanellën.

Trepça ka hapur vjet fan-shopin e parë zyrtar, ku tifozët i blejnë rekuizitat e klubit të shpirtit. Me fanellat e baskebollistëve të tyre, sidomos të mitrovicasit Drilon Hajrizi, mund të shëtiten krenueshëm edhe nëpër qytet. 

Edhe Sport 15 maj 2023 “Dy zemra unë me i pasë, dyjat t’i kisha falë”

Interesimi i madh i shikuesve dhe kthimi i fuqishëm i Trepçës në luftën për titull ka bërë që nga diaspora të vijnë mërgimtarët mitrovicas për ta shikuar edhe një ndeshje të vetme.

Ai dhe Adnan Musa – Naki, ish-kryetar i tifozerisë “Torcida” thonë se pjesëmarrja e Trepçës në play off i ka mobilizuar edhe klubet e tjera.

Interesimi i jashtëzakonshëm i mitrovicasve për të siguruar një biletë ka rrokur vëmendjen e mbarë Kosovës, duke ndikuar kështu në ngritje të shikueshmërisë së play offit edhe nëpërmjet ekraneve televizive.

Por Federata e Basketbollit e Kosovës, pas disa incidenteve para fazës finale të kampionatit, ka marrë vendim që ndeshjet të luhen pa tifozët mysafirë.

Megjithatë në qytetin e ndarë në dysh e që vëmendjen e madhe kombëtare e ndërkombëtare e rrok më shumë për shkak të tensioneve politike të shkaktuara nga serbët e veriut, ndeshjet e basketbollit përbëjnë më shumë se sfidë sportive për fitore në palestër.

Nënkryetari Tahiri thotë se pavarësisht sfidave ekonomike e politike të qytetarëve, ditët e ndeshjeve të Trepçës ia ndryshojnë humorin të gjithë mitrovicasve.

Ai thotë se Mitrovicës i duhet ndihma e Qeverisë qendrore për ndërtimin e një palestre që do t’u bënte vend të gjithë tifozëve të Trepçës.

Edhe Basketboll 29 sht 2026 Bashkimi synon ta shfrytëzojë momentin jo të mirë të Trepçës

Xehetarët janë të bindur se sonte ose të enjten do ta lartësojnë trofeun e kampionit.

Por edhe nëse nuk do t’ia shtojnë edhe një trofe vitrinës së tyre në palestrën “Minatori”, tifozët tashmë janë krenarë që ia kanë shtuar shkëlqimin basketbollit të Kosovës.