Hendbollistet e Kosovës kanë pësuar disfatë në ndeshjen e parë të fazës së dytë kualifikuese për Kampionatin Botëror të këtij viti.
Në duelin e parë prej dy ballafaqimeve me polaket, Kosova të enjten mbrëma u mposht me rezultatin 36:22.
“Dardanet” e udhëhequra nga përzgjedhësi Agron Shabani, vetëm në fillim të pjesës së parë ishin konkurrente të denja për polaket.
Kosova kaloi e para në epërsi, por nuk e ruajti rezultatin.
Ndërkohë, Përfaqësuesja e Polonisë me përvojë, barazoi rezultatin fillimisht e më pas kaloi në epërsi të cilën nuk e lëshoi deri në fund të ndeshjes.
Pjesën e parë, Polonia e mbylli me 11-të pikë epërsi, 17:6.
Në pjesën e dytë, Kosova nuk e pati forcën që të bënte diçka më shumë nga kjo përballje, dhe humbi me 14 pikë epërsi.
Polonia në Botërorin e kaluar ishte renditur në vendin e 15-të, ndërsa në vitet 2013 dhe 2015, kishte zënë vendin e katërt.
Në Evropianin e vitit të shkuar, Polonia kishte përfunduar në vendin e 13-të.
Paraqitet rregullisht në ngjarje të mëdha.
Ndeshja u zhvillua në Bielsko-Bala në Poloni, ndërsa dueli kthyes do të luhet më 12 prill në Prishtinë.
Në fazën e parë kualifikuese të Botërorit, Kosova e kishte eliminuar Përfaqësuesen e Ishujve Faroe.
Kampionati Botëror i këtij viti do të mbahet në Danimarkë, Norvegji e Suedi, prej 29 nëntor deri më 17 dhjetor.
Në edicionin e 26-të të këtij turneu nga Evropa janë kualifikuar Franca, Mali i Zi dhe Holanda.
Nga këto kualifikime në Botëror do të kualifikohen edhe dhjetë përfaqësuese të tjera.