Barcelona ka fituar pa shumë telashe dy titujt e fundit të La Ligas dhe angazhimi i Antoine Griezmannit në një vijë të sulmit edhe ashtu i fortë, e bën Barçën favorite për të fituar titullin e tretë rresht në La Liga.
Barcelona nuk po shikon vetëm për të vazhduar hegjemoninë në frontin vendor, pasi ka shpenzuar 250 milionë euro në tentimin për të fituar edhe Ligën e Kampionëve, pas një eliminimi dëshpërues nga Liverpooli në gjysmëfinale stinorin e kaluar, shkruan Reuters, transmeton “Koha Ditore”.
Pasi përfundoi 11 pikë para Atletico Madridit në La Liga stinorin e kaluar, duke fituar titullin e tetë në 11 vjetët e fundit, Barcelona veproi duke transferuar për 120 milionë euro Griezmannin nga Atletico, që ishte golashënuesi më i mirë i skuadrës madrilene në pesë stinorët e fundit.
Barcelona e mori Griezmannin, ndonëse francezi në mënyrë publike e kishte refuzuar një vit më parë, duke vendosur të mbetet tek Atletico. Barcelona ishte e interesuar t'i shtonte shkëlqim sulmit, ku janë emra si Lionel Messi e Luis Suarez.
Griezmann do të garantojë më tepër gola, por kreativiteti, inteligjenca dhe puna e tij do të jenë më të rëndësishme, veçanërisht në fazën e mëvonshme të Ligës së Kampionëve, garë të cilën Barça nuk e ka fituar që nga viti 2015.
Edhe
Griezmann ëndërron finale përrallore në edicionin lamtumirës
“Ne jemi shumë të lumtur me atë që na ka dhënë deri më tash, lëvizja e tij na ofron shumë dhe ai punon fort edhe në aspektin defensiv”, ka thënë trajneri i Barcelonës për Griezmannin, pas fitores 4:0 të dielën në miqësore ndaj Napolit. “Fakti se ai mund të luajë si qendërsulmues apo në krah është përparësi për ne. Ai mund të luajë nga prapa, por gjithmonë i pëlqen të futet në zonë pasi shënon shumë gola. Ai është lojtar tjetër nga ata që kemi pasur më herët”.
(Artikullin e plotë mund ta lexoni sot në “Koha Ditore”)
