Gjermania mbështet FFK-në me një ekspert të futbollit

Ambasada e Gjermanisë ka njoftuar se do të vazhdojë ta mbështesë Federatën e Futbollit të Kosovës me një ekspert gjerman, përmes Federatës Gjermane të Sportit Olimpik.

Eksperti gjerman i futbollit, Michael Nees do të vijë në Kosovë për të mbështetur FFK-në edhe për një vit. Sipas njoftimit, ai ka ndihmuar FFK-në që nga viti 2017.

“Kemi kënaqësinë të vazhdojmë së mbështeturi zhvillimin e futbollit kosovar me ekspertin e futbollit, Michael Nees, duke u përqendruar në futbollin e fëmijëve, të rinjve, si dhe futbollin e femrave, gjegjësisht vajzave”, ka thënë ambasadori Christian Heldt.

Eksperti gjerman, sipas njoftimit, gjatë punës së tij do të përqendrohet më forcimin, zhvillimin dhe zgjerimin e infrastrukturës teknike të futbollit të Kosovës. Kjo përfshinë këshillimin e FFK-së, veçanërisht në fushën e trajnimeve bazë dhe të avancuara për trajnerët, programin për përmirësimin e strukturave të futbollit në nivel rajonal dhe ndërkombëtar, si dhe përqendrimin e veçantë në futbollin e fëmijëve, të rinjve, përfshirë futbollin e femrave dhe vajzave, e po ashtu edhe futbollin në shkolla, duke mbështetur formimin e ekipeve përfaqësuese të të rinjve.