Ish-kampioni olimpik në vrapim 100 metra, Justin Gatlin, thotë se mund të fitoj medaljen e artë në Lojërat Olimpike të Tokios, ndonëse do të jetë 39-vjeçar kur të mbahet ngjarja e shtyrë.
Sprinteri amerikan ka fituar të artën në Lojërat Olimpike “Athina 2004” dhe titullin e botës në vitin 2017, pasi vuajti dënimin e dytë për doping.
Lojërat Olimpike, që është dashur të mbahen në korrik e në gusht, janë shtyrë për shkak të pandemisë së koronavirusit. Ngjarja më e madhe sportive do të mbahet më së largu në verën e vitit 2021.
“Shumë njerëz mendojnë se koha është kundër meje por kjo është larg prej së vërtetës. Do të pushojë trupin, do të fokusohem dhe do të mbetem i uritur. Do të kthehem me shumë energji në vitin 2021”, ka thënë Gatlin për TMZ Sports.
“Trupi im nuk do të jetë i lodhur duke vrapuar në shumë gara gjatë vitit 2020. Nuk do të jetë shumë dallim në mes të moshës 38-vjeçare dhe 39-vjeçare”.
Gatlin ishte i suspenduar nga viti 2006 deri në vitin 2010 pasi doli pozitiv për doping. Në vitin 2001 ishte suspenduar për një vit për arsye të njëjtë.
Edhe
Bolti planifikon kthimin në Olimpiadë, por në një sport tjetër
Fitorja e tij në Botërorin e vitit 2017, kur befasoi Usain Boltin, ishte pëlqyer nga tifozët në tribuna.
Gatlin nuk e ka përjashtuar mundësinë që të vazhdoj me gara edhe pas vitit 2021. Ai ka përmendur lojtarin e futbollit amerikan, Tom Brady, që ka nënshkruar me Tampa Bay në moshën 42-vjeçare, këtë javë.
“Më jep shpresë që ndoshta paraqitja e Justin Gatlinit në shteg në moshën 40-vjeçare nuk do të jetë gjë shumë e çmendur”, ka thënë ai.
