FFK-ja synon të nisë me ndeshje më 23 maj, MSH-ja thotë se aktivitetet sportive nisin më 1 qershor

Më 23 e 24 maj ndeshjet gjysmëfinale të Kupës së Kosovës, më 30 maj ndeshjet kampionale.

Ky është synimi i Federatës së Futbollit të Kosovës sa i takon rifillimit të garave të futbollit në vend. Të enjten mbledhje ka mbajtur Komiteti Ekzekutiv i FFK-së, që unanimisht ka vendosur për rifillimin e kampionatit.

Komiteti Ekzekutiv i FFK-së ka përpiluar një pasqyrë të orarit të ndeshjeve të mbetura. Sipas njoftimit orari është në koordinim të plotë me kërkesën e UEFA-s për përfundim të edicionit më së largu më 20 korrik. Por orari nuk përputhet me hapat e planifikuar për kthim në normalitet të Ministrisë së Shëndetësisë.

MSH-ja ka njoftuar të enjten se “hapja selektive e aktiviteteve sportive” është në fazën e tretë, që fillon më 1 qershor. Pra Ministria e Shëndetësisë nuk parasheh aktivitete sportive në maj, ashtu si synon FFK-ja, raporton Koha.net.

“KE do ta paraqesë këtë format të kalendarit në institucionet shëndetësore dhe në ato vendimmarrëse të vendit, me kërkesën që ekipeve t’u mundësohet fillimi i stërvitjeve në grupe nga 10 maji. Derisa rifillimi i garave të bëhet me ndeshjet gjysmëfinale të Digitalb Kupës së Kosovës më 23 e 24 maj, ndërkaq kampionati i IPKO Superligës të vazhdojë nga 30 maji dhe xhirot e mbetura të luhen deri më 15 korrik. Ky edicion i garave do të mbyllet me finalen e Kupës, më 18 korrik”, thuhet në njoftimin e FFK-së.

“Të gjitha ndeshjet do të luhen pa shikues dhe me masa të rrepta sigurie për shëndetin e futbollistëve dhe pjesëmarrësve tjerë në ndeshje”.