Deva e 31-ta në sllallom të madh në Olimpiadën për të Rinj

Skitarja Lirika Deva ka garuar të martën në Lojërat Olimpike Dimërore për të Rinj që po mbahen në Gangwon të Koresë së Jugut.

Deva garoi në sllallom të madh dhe u rendit e 31-ta. Garën e filluan 79 skitare të reja, por 36 prej tyre nuk përfunduan me sukses të dy lëshimet.

43 skitare përfunduan garën me sukses, ndërsa koha e garueses kosovare ishte 1:54.87 minuta.

Garën e fitoi italiania Giorgia Collomb me kohë prej 1:41.10 minuta. Në Gangwon, Kosovën e përfaqëson edhe Klos Vokshi.

“Në një konkurrencë të fortë, pozita e 31-të vlerësohet e suksesshme për Lirikën, e cila do të garojë të enjten në disiplinën e sllallomit”, ka shkruar Komiteti Olimpik i Kosovës.