Mesfushori danez Mikkel Damsgaard është përforcimi më i ri i skuadrës së Brentfordit që bën gara në Premier League.
Damsgaard është prezantuar të mërkurën te Brentfordi, ekip me të cilin ka firmosur kontratë pesëvjeçare.
22-vjeçari te Brentfordi është transferuar nga skuadra e Sampdorias.
Edhe pse ekipi anglez nuk ka bërë të ditur detajet e marrëveshjes me Sampdorian, mediumet italiane kanë raportuar se Brentfordi do të paguajë 15 milionë euro me bonuse për Damsgaardin.
Danezi ishte pjesë e Sampdorias prej vitit 2020 kur iu bashkua nga Nordsjaellandi për shtatë milionë euro, ndërsa te Brentfordi do ta zëvendësojë Christian Eriksenin që u largua si lojtar i lirë për t’u transferuar te Manchester Unitedi.
