-
Nga:
Arsim Maxhera
- 30 janar 2023 11:31
- Shpërndaje në:
Mërgim Berisha ka shënuar gola në dy ndeshjet e fundit në Bundesligë. Gjithsej i ka pesë gola e katër asistime në këtë edicion të kampionatit gjerman.
Elvis Rexhbeçaj ka lëshuar vetëm një ndeshje këtë edicion. Ishte i pezulluar për shkak të kartonëve. Ka startuar në 17 të tjerat.
Sulmuesi Berisha e mesfushori Rexhbeçaj janë pjesë e skuadrës së Augsburgut. Kjo, megjithatë, nuk është e përbashkëta e vetme e tyre. Dyshja e klubit gjerman mbetet shumë e lakmuar nga Përfaqësuesja e Kosovës në futboll. Përpjekjet që ata të binden të luajnë për Kosovën nuk po ndalen. Deri më tani pa sukses.
Portieri Diant Ramaj është një tjetër anëtar i Bundesligës dhe një tjetër lojtar “në listën e dëshirave” të Kosovës. Ai e ruajti portën e Eintracht Frankfurtit më 25 janar dhe mori vlerësime në superlativ. Vlerësime në superlativ për Ramajn ka edhe te Kosova. Por deri tani 21-vjeçari nuk është bindur të luajë për “Dardanët”.
E ka edhe një të përbashkët të rëndësishme kjo treshe e Bundesligës. Berisha, Rexhbeçaj e Ramaj nuk kanë luajtur për përfaqësuese seniore. Dhe kështu e kanë të drejtën të zgjedhin Kosovën, apo Shqipërinë. Apo Gjermaninë, nëse i kërkon ajo.
Edhe
Kosova pritet të forcohet me lojtar të Bundesligës
Derisa për Berishën ka pasur zëra se mund të ftohet nga Gjermania, Rexhbeçaj e Ramaj duken më larg saj. Dhe këtu Kosova mund ta shohë rastin.
“Sigurisht që këta tre lojtarë i njohim dhe jemi të interesuar për ta”, ka thënë të dielën për KOHËN selektori i Kosovës, Alain Giresse. “Tani ata e kanë mundësinë për të luajtur për Kosovën. Por ka edhe lojtarë të tjerë që i përcjellim dhe për të cilët jemi të interesuar. Disa janë edhe në listat e përfaqësueseve të vendeve ku luajnë, kryesisht te kategoritë e reja”, ka shtuar Giresse, pa qartësuar shumë.
Ai ka thënë se i përcjell në baza ditore të gjithë lojtarët e Kosovës, por edhe ata që një ditë mund të luajnë për Kosovën.
KOHA ka mësuar se përgjegjësit e FFK-së kanë përdorur mënyra të ndryshme për t’u afruar me Berishën, Rexhbeçajn e Ramajn. Dhe po presin që ata të vendosin për ndonjë hap. Për ndonjë takim me përgjegjësit e FFK-së, për shembull. Interesimi i Kosovës për këta lojtarë të Bundesligës është shumë serioz e shumë konkret. Por deri më tani pa përgjigje.
Berisha, Rexhbeçaj e Ramaj hezitojnë të flasin edhe për mediat kosovare. Kështu që për momentin afrimi i tyre te Kosova nuk duket shumë i afërt. Por niveli i tyre si futbollistë bën që përpjekjet e përgjegjësve të mos ndalen.
Edhe
Mërgim Berisha konfirmon se ëndërron të luajë me Gjermaninë në Evropian
Kosova ka pak lojtarë në ligat e mëdha evropiane. Tre lojtarë të Bundesligës do të ishin të mirëseardhur, sidomos për faktin që janë të pozitave në të cilat Kosova nuk ka shumë konkurrencë aktualisht. Arijanet Muriq vlerësohet i pakonkurrencë për portë. Vedat Muriqi është thuajse sulmuesi i vetëm tipik i Kosovës në nivel të lartë ndërkombëtar. Ndërkohë në mesfushë Kosova ka disa vjet që ka telashe. Dhe ardhja e Berishës, Rexhbeçajt apo Ramajt do të ishte me shumë peshë për Kosovën. Këtë e dinë edhe Giresse dhe bashkëpunëtorët e tij.
Berisha, 24-vjeçar, është i lindur në Gjermani, është zhvilluar si lojtar në Austri dhe tani sërish po luan në Gjermani. Ka 13 paraqitje e një gol me U21 të Gjermanisë. Vlerësohet me potencial për të luajtur për Gjermaninë A, sidomos pas formës jo të kënaqshme që gjermanët shfaqën në Kupën e Botës.
Rexhbeçaj është 25-vjeçar, por nuk ka luajtur në asnjë përfaqësuese, as për grupmosha e as në A. Është i lindur në Kosovë e i rritur në Gjermani.
Ramaj është ende 21-vjeçar. Është, po ashtu, i lindur në Gjermani dhe ka luajtur për U18, U19 e U20 të Gjermanisë. Te Eintrachtu paraqitet pak, por vlerësohet për potencialin.
Edhe
Rexhbeçaj – lojtari “pa” përfaqësuese që me 24 vjet bëhet kapiten në Bundesligë
Kosova në mars i luan ndeshjet e ardhshme. Ciklin e kualifikimeve për Euro 2024 pritet ta fillojë pa këtë treshe të Bundesligës. Me shumë gjasa edhe do ta përfundojë pa këtë treshe në përbërje.
