Ka pasur shumë interesime nga klube të Bundesligës gjermane dhe Porto portugeze për mesfushorin shqiptar që përfaqëson Zvicrën, Ardon Jashari.
Në garë zyrtarisht ka hyrë edhe skuadra tjetër e madhe e Portugalisë dhe kampioni në fuqi, Benfica.
Kështu ka shkruar të shtunën mediumi portugez “A-Bola”.
Sipas këtij mediumi, kampioni portugez ka kontaktuar përfaqësues të Jasharit dhe Luzernit, skuadrës ku ai luan.
Jashari 20-vjeçar ka kontratë me Luzernin deri në vitin 2026, ndërsa çmimi i tij vlerësohet të jetë 7.5 milionë euro.
Benfica vlerësohet si fabrikë e talenteve dhe ka zhvilluar shumë futbollistë të njohur të futbollit botëror, përfshirë Angel Di Marian, Ruben Diasin, Bernardo Silvan, Joao Felixin e Darwin Nunezin.
Jashari për momentin është i angazhuar me Zvicrën U21 në Kampionatin Evropian në Gjeorgji dhe Rumani.
Në edicionin e fundit, Jashari zhvilloi 37 ndeshje për Luzernin në të gjitha garat.
Pati një gol të shënuar e katër asistime.