Arbëria e Dobrajës ka vazhduar startin impresiv në edicionin debutues në Superligën e Kosovës në futboll. Pas fitores ndaj Trepçës ’89 dhe barazimit me Prishtinën, Arbëria të premten shënoi fitore ndaj Besës së Pejës me rezultat bindës, 3:0.
Ndeshja është luajtur në stadiumin “Tahir Vokshi” në Brestovik të Pejës. Kjo ndeshje e ka hapur xhiron e tretë të Superligës së Kosovës në futboll.
Agon Llugiqi shënoi golin e parë për Arbërinë në minutën e 49-të, ndërsa Labinot Ibrahimi realizoi penallti në minutën e 69-të për rezultatin 2:0. Penalltia u shkaktua për lojë me dorë brenda zonës. Në fund, Qlirim Kashtanjeva shënoi gol të bukur për rezultatin përfundimtar, 3:0. Ai realizoi në minutën e 86-të.
Arbëria me fitore ka dalë në vend të parë me 7 pikë. Besa mbetet e fundit pa pikë të fituar. Besa është kthyer në elitë, por fillimin e ka shumë të vështirë.
