-
Nga:
Arsim Maxhera
- 11 nëntor 2021 22:24
- Shpërndaje në:
Federata Ndërkombëtare e Boksit Amator (AIBA) është mburrur se ka promovuar mundësi të barabarta gjatë Botërorit të boksit që kohë më parë është mbajtur në Beograd. Në fakt, politika e AIBA-s për “mundësi të barabarta” lë për të dëshiruar, të paktën sa i takon Kosovës.
Boksierët e Kosovës nuk u lejuan të hyjnë në territorin e Serbisë për të marrë pjesë në Botëror. Kishin tri përpjekje, por autoritetet serbe nuk i lejuan ta kalojnë kufirin. AIBA ka lëshuar dy komunikata lidhur me diskriminimin që u bëhej boksierëve të Kosovës, por pa njoftuar për ndonjë masë konkrete ndaj Serbisë si nikoqire. AIBA kishte njoftuar se ka marrë premtimin e organizatorit se do të mundësohej pjesëmarrja e të gjitha delegacioneve, pra edhe e atij të Kosovës. Kishte njoftuar, po ashtu, se për rastin e Kosovës do të njoftonte federatat e tjera ndërkombëtare që organizojnë ngjarje në Beograd dhe vende të tjera të Serbisë. Kaq.
Deri më tani nuk është bërë e ditur ndonjë masë ndaj Federatës së Boksit të Serbisë si organizatore e Botërorit.
“AIBA dëshmoi angazhimin e saj për mundësi të barabarta, duke ofruar mbështetje për 18 federata kombëtare të boksit, e po ashtu për ekipin e parë të ‘Shansit të Drejtë’ gjatë Botërorit në Beograd”, shkruan në një komunikatë të AIBA-s të publikuar të enjten.
Boksierë nga 88 federata nacionale morën pjesë në Botërorin që përfundoi më 6 nëntor. Fituesit e medaljeve të arta në 13 kategori u shpërblyen me nga 100 mijë dollarë, ndërsa shpërblime financiare kishte edhe për fituesit e medaljeve të argjendta (50 mijë dollarë) dhe atyre të bronzta (25 mijë dollarë).
AIBA ka përkrahur disa federata si ajo e Kamerunit, Kolumbisë, Republikës Dominikane, Ekuadorit, Gjeorgjisë për t’i mbuluar shpenzimet e udhëtimit dhe të akomodimit. Katër medalje janë fituar nga boksierët e federatave që i ka mbështetur AIBA: Sakhi Alakhverdovi dhe Lasha Guruli të Gjeorgjisë, Alexy De La Cruz Baez i Republikës Dominikane dhe Paul Nigel i Trinidad-Tobagos. Të gjithë këta fituan medalje të bronzta.
“Ia dedikoj medaljen presidentit të AIBA-s, Umar Kremlev, që gjithnjë e ka përkrahur Federatën e Boksit të Republikës Dominikane, që na mundëson të kryejmë punën tonë. Falë tij dhe ndihmës së tij, ne ia dolëm të fitojmë medalje. Pa asistencën e tij nuk do të ishte e mundur. Këtë medalje ta dedikoj ty z. President”, ka thënë De La Cruz Baez.
Për boksierët e Kosovës ishte e pamundur, ndonëse AIBA mburret se ofroi mundësi të barabarta. Ishte e pamundur pjesëmarrja, që është prej parimeve bazë për thuajse të gjitha federatat ndërkombëtare.
