Giresse: Muja ka kërkuar garanci për vendin e titullarit

Selektori Alain Giresse ka folur edhe për sulmuesin e krahut, Arbnor Mujën, i cili ka fituar titullin e kampionit me Antëerpin në Belgjikë.

Muja nuk është përfshirë në listën e Kosovës për ndeshjet e këtij muaji, por Giresse thotë se e kishte ftuar.

Madje, trajneri ka thënë se Muja ka kërkuar garanci se do të jetë titullar për të qenë pjesë e grumbullimit, gjë që nuk ia ka garantuar Giresse.

“Sa i përket Mujës, në fakt e kam ftuar për miqësoret që i kemi pasur në nëntor por nuk ka ardhur. Pastaj e kam ftuar për ndeshjet e muajit mars dhe ishte pjesë e ekipit”, u shpreh Giresse.

“Sa i përket këtyre ndeshjeve, Muja ka kërkuar garanci për vendin e titullarit, gjë që i kam shpjeguar se askush nuk e ka të garantuar një gjë të tillë. Dhe, nëse mendon kështu, atëherë është më mirë mos të vijë sesa të vije e të mos luaj”.

Në konferencën për shtyp, selektori i Kosovës, Alain Giresse është pyetur edhe për lojtarët që nuk i ka ftuar për ndeshjet e këtij muaji.

Në listën e tij prej 23 futbollistëve të ftuar, Giresse ka lënë jashtë lojtarë si Arbër Zeneli, Florent Hadërgjonaj, Valon Berisha, Zymer Bytyqi, Arbnor Muja e Mirlind Daku. Ai ka folur për të gjithë këta lojtarë, ndërsa ka shtuar se disa prej tyre janë zgjedhje sportive.

“Sa i përket Florentit, ka të bëjë me arsye personale që ai nuk ka mundur të jetë pjesë e grumbullimit. Te Berisha kam bërë zgjedhje sportive dhe ky është vendimi im. Te Zeneli e Bytyqi, ka të bëjë me minutazhën e vogël që e kanë pasur në klubet e tyre, andaj qoftë në aspektin moral ashtu edhe fizik nuk mendoj se ata ishin të gatshëm për t’u grumbulluar. Madje, me Zenelin kam diskutuar për këtë çështje”, u shpreh Giresse.

“Edhe Mirlind Daku është zgjedhje sportive për disa arsye. Pastaj në repartin e sulmit kemi shumë lojtarë edhe pse jam i vetëdijshëm se ai po luan mirë”.

Përzgjedhësi i Kosovës, Alain Giresse i ka vlerësuar si tejet të rëndësishme dy ndeshjet e këtij muaji që “Dardanët” i luajnë në kuadër të kualifikimeve për “Euro 2024”.

Në konferencën e mbajtur për shtyp të premten, Giresse ka insistuar se beson që ekipi do të jetë gati për duelin me Rumaninë dhe Bjellorusinë.

Kosova luan më Rumaninë në Prishtinë më 16 qershor, ndërsa tri ditë më vonë, do të përballet me Bjellorusinë në Budapest të Hungarisë. Kosova, të enjten ka nisur grumbullimin ndërsa prej ditës së sotme ka filluar me nga dy seanca stërvitore në ditë.

Megjithatë, Giresse ka thënë se ekipi ende nuk është kompletuar dhe është në pritje të lojtarëve që ti bashkohen gjatë këtyre ditëve, në mënyrë që të fillojnë përgatitjet me intensitet maksimal.

“Jemi mbledhur për dy ndeshjet që i luajmë ndaj Rumanisë dhe Bjellorusisë. Grumbullim që ka filluar para dy ditësh dhe që po zhvillohet në mënyrë progresive pasi ende nuk janë të gjithë lojtarët këtu. Nuk po i mbajnë stërvitjen 100% për shkak se po presim të na bashkohen të gjithë lojtarët, pasi disa udhëtojnë nga vendet”, ka thënë Giresse.

“Nuk besoj qe do shume mend qe dy ndeshjet qe i kemi se janë shume te rëndësishme. Do te tentojmë sa me pak te mendojmë për ndeshjet e shkuara, por te përgatitemi për këto ndeshje qe i kemi. Pastaj i referohemi barazimeve qe i referohemi si rezultate negative, por nuk besoj se rezultati me Izraelin ishte negativ dhe duhet te vazhdojmë te shohim përpara”.

© KOHA. Të gjitha të drejtat janë të rezervuara.