Asociacioni i Gazetarëve të Kosovës e ka dënuar vendimin e Federatës së Futbollit që Kuvendin zgjedhor ta mbajë pa gazetarë të pranishëm dhe pa praninë e të gjithë mediave.
Përmes një reagimi, AGK-ja ka thënë se arsyetimi i FFK-së për mungesë të hapësirës është i paqëndrueshëm.
“Arsyetimi i hapësirës është i paqëndrueshëm, pasi që ngjarje të ngjashme janë mbuluar edhe në të kaluarën nga të gjitha mediat e interesuara. Një mbyllje e tillë pamundëson raportimin profesional nga vendi i ngjarjes, për një ngjarje të rëndësishme dhe me interes publik. AGK-ja kërkon nga FFK-ja të rishqyrtojë vendimin dhe të lejojë gazetarët dhe mediat të kryejnë punën e tyre të papenguar”, thuhet në reagimin e AGK-së.
Me vendim të FFK-së të martën, Kuvendi zgjedhor do të përcillet vetëm nga një transmetues.
