“Tik Tok” me ndikim në shitjen e librave

“Shadow and bone”, “Ruin and rising”, “Siege and storm’, “We were liars” e “Shatter me” janë vetëm disa nga librat e shitur në stinën e verës, përmes videove në rrjetin social “Tik Tok”.

Iliriana Hasaj, koordinatore në librarinë “Dukagjini” tregon se ky ndikim është vërejtur qysh në fillim të verës.

Është e shpeshtë kërkesa e një libri që tregohet haptas se është gjetur në “book tok” e që shumë prej tyre janë të përkthyer edhe në gjuhën shqipe e gjenden edhe si filma.

Por kur rrugët vishen me gjethe, e temperaturat bien thuhet se është koha e duhur për të lexuar një novelë të gjatë, një roman me histori dashurie, mister apo biografi.

Megjithatë edhe këtë vjeshtë në shitje vazhdojnë të kryesojnë librat shkollorë e për fëmijë.

Elif Shafak, Milan Kundera, Matt Burgess e Collen Hoover janë autorët e disa nga botimeve që Ilirana propozon se duhet pasur në bibliotekë në këtë fundvit.

Por cilët janë titujt?

10 minutat e 38 sekondat e fundit të jetës së Leilës që e dërgojnë atë në fëmijëri, në një provincë me ambient ndrydhës e ku shfaqet jeta e Stambollit modern, si dhe rrëfimet e miqve të saj mund t’i lexoni në romanin e Elif Shafak.

Sipas Ilirianës, “Mbaron me ne” është romani tjetër realist dhe shumë i guximshëm që ngërthen në vete më shumë sesa një histori dashurie.

Pavarësisht botimeve e historive të reja, janë disa libra që po vazhdojnë t’u mbijetojnë kohërave. Të tillë janë: “Gjuetari i balonave”, “Një mijë diej vezullues”, “Alkimisti” “Sekreti” e shumë të tjerë.