Fshati Abri e Epërme e Drenasit shpesh përmendet si prejardhja e Xhemal Abrisë. Fjalët e mëdha, meseletë dhe e pleqnitë e çështjeve shoqërore të tij para dy shekujve dihen ende nga shumë vende të Kosovës.
Por, në ditët e sotme, në fshat njihet Qamile Muliqi, fermere e suksesshme, që njihet për kultivimin e bimëve të shumta të cilat eksportohen jashtë Kosovës, raporton KOHA.
Hithrat, që nuk njihen shumë për prestigj, janë një nga kulturat të cilat ajo i ka përzgjedhur t’i mbjellë për vitin e dytë me radhë.
Muliqi tregon se kërkesa është e madhe, si për hithrat, ashtu edhe për lulet si mëllaga e zezë, kalendula e ciani. E më së shumti ajo e veçon mëllagën e zezë.
Edhe çmimi i saj, sipas Muliqit, pritet të jetë i mirë - bazuar në vitet e kaluara.
Mëllaga, që çel lule të shumta brenda ditës, kërkon punë. E, për këtë arsye, vjeljen, Muliqi me familjarë e kanë bërë në mënyrë të veçantë.
Edhe
Kosova pa fond për kompensim të dëmeve në të mbjella
Duke folur pranë luleve të kaltra të cianit, Muliqi tregon se të gjitha këto kultura duhen kultivuar në mënyrë organike për zhvillim.
Karakteristikë e cianit, sipas saj, është ndjeshmëria.
Muliqi është falënderuese që ka marrë si donacione tharëse të luleve e gjetheve dhe sistemin e ujitjes. Ajo shton, veç tjerash, se këto kultura rishiten nga fabrika kosovare jashtë vendit në masë prej 100%.
