Gratë që po e pushtojnë tregun e fermerëve

E merr rrugën nga fshati Juban i Shkodrës për të ardhur në Prishtinë për ditët e tregut mobil.

E hëna e gjen këtu, e gjumin për ta pritur të martën e bën në hotelin “Grand”. Me të aguar dita, ajo vendoset para hotelit, ku bashkë me tregtarë të tjerë ekspozojnë produktet.

Mikpritja e kosovarëve thotë se e bën të ndihet si në shtëpi.

E interesimi i madh për punimet e saj ia shton vullnetin për ta vazhduar këtë veprimtari edhe tash në moshën 71-vjeçare.

Që e vogël mbeti jetim dhe rrethanat e detyruan ta mësojë punën në veg, e deri më tash mijëra punime dolën nga duart e saj.

Çorapet nga leshi, veshjet kombëtare dhe xhamadanët janë vetëm disa nga produktet që ajo i punon.

Me anë të një thënies së vjetër e tregon edhe sa e vështirë është kjo punë, kohën dhe përkushtimin që e kërkon.

Ka më shumë se 20 vjet prej kur Raza Demolli nga fshati Gllogovicë merret me kultivimin e luleve.

Aloe vera, kaktuse të ndryshme e shumëllojshmëri të erëzave i ekspozon në shtandin e tregut mobil.

Përkushtimin dhe dashurinë që lulet e kërkojnë për t’u zhvilluar, Demolli ua dhuron çdo ditë, e qetësinë thotë se e gjen kur kujdeset për to.

Në mesin e luleve dhe erëzave, ajo tash po e kultivon dredhëzën e artë, frutë kjo jo shumë e njohur për klientët e saj.

Por ajo me informatat që i ka marrë në internet po arrin që ta shesë këtë lloj frute të veçantë.

Mbështetja e familjes për Gjyliana Ndocin dhe Raza Demollin e ka një rëndësi të madhe në punën e palodhshme që ato e bëjnë.