Jo rrallëherë suksesi është i lidhur me fatin. Këtë e dëshmon më së miri rrugëtimi në muzikë i 23-vjeçares Drenicë Zogaj nga fshati Kleqkë i Malishevës.
Ajo kishte ëndrra të mëdha në punët administrative në doganë dhe shpedicion, për çka edhe mbaroi studimet, ndërsa muzikën e kishte filluar qysh nga fëmijëria vetëm si hobi.
Një ditë e saj rutinë nis në një klinikë shëndetësore. Zogaj thotë se puna aspak nuk e pengon në karrierën e saj muzikore.
Pasi përfundon orarin e punës, Drenica niset në studion muzikore për provat e saj të këndimit. Edhe pse ia merr një pjesë tjetër të ditës, është pasioni për këngën që 23-vjeçaren e mban me energji.
Këndon këngë të ndryshme, por më së shumti i flenë në shpirt këngët e lehta qytetare, po ashtu dhe ato patriotike.
Këngëtarja tregon se karriera e saj muzikore para një publiku të gjerë nisi 5 vjet më parë në “Voice of Albania”. Qysh atëherë e deri më sot pasioni i saj për muzikën nuk u ndal.
Megjithatë, në industrinë kosovare të muzikës, veç punës kërkohet edhe durim. Drenica planifikon në një të ardhme të afërt që të krijojë një këngë të saj.
Për të kaluar lodhjen e gjithë ditës, këngëtarja praktikon ecjen në male. Për t’u argëtuar, ajo mbledh familjarë e shoqëri.
Në rrugëtimin me kaq shumë ambicie, patjetër duhet të kesh edhe mbështetjen e familjes.
Elvira Zogaj është mbështetja më e madhe në çdo rrugëtim të motrës së saj.
Talenti i saj, Drenicën e bën të jetë premtuese për tregun e muzikës. Ëndrra e saj është të arrijë majat e suksesit në muzikë.
