Disney është në kërkim të një mrekullie të re për audiencën. Studioja e njohur filmike ka shfaqur trilerin e filmit të saj të ri, “The Little Mermaid”, dhe duket se filmi do ta marrë publikun me vete në botën surreale dhe mistike të kryepersonazhit Ariel.
Filmi është bazuar në një prej klasikëve të njohur të Hans Christian Andersenit dhe sjell historinë e një sirene që ëndërron të jetë njeri dhe përpiqet t’i përfitojë këmbët që të shkojë në botën njerëzore. Kjo është hera e parë që Disney do të sjellë një version filmik të Arielit në ekranin e madh.
Në pamjet e publikuara shfaqet aktorja Halle Bailey, së cilës i është besuar roli i Ariel, duke kënduar një nga këngët më të njohura të filmit “Part of Your World”. Ky moment ka emocionuar shumë fansa të klasikut të Disneyt, duke shkaktuar një reagim të paparë në rrjetet sociale. Kënga, e kënduar me zërin e qetë të Halle Bailey, u vlerësua më shumë se çdo gjë tjetër në trailer.
Pjesë e filmit të ardhshëm janë edhe personazhet tjera të njohura si, princi Eric, Sebastian, Flounder dhe Ursula, rolin e së cilës e portretizon aktorja komike, Melissa McCarthy. Imazhet janë të përshtatshme dhe të ngjashme me origjinalin, por Disney ka shtuar disa elemente të reja, duke përfshirë një mjedis më të pasur dhe detajet që përpiqen të shtojnë dinamikë në këtë histori.
Format i ri i “The Little Mermaid” duket se do ta mbajë gjallë emocionin dhe magjinë e filmit të animuar, duke i sjellë aktorët dhe personazhet në jetë.
“The Little Mermaid” pritet ta ketë premierën më 26 maj të këtij viti.
