Scarlett Johansson do ta pranojë çmimin “Generation Award”

Aktorja e njohur për portretizimin e heroinës “Black Widow”, Scarlett Johansson, do ta pranojë shpërblimin “Generation Aëard” në ceremoninë e sivjetme “MTV Movie & TV Awards”.

Kështu, aktorja 36-vjeçare i ndjekë hapat e yjeve tjera të filmave “Marvel”, Robert Downey Jr. dhe Chris Pratt, të cilët janë nderuar me këtë çmim në të kaluarën. Shpërblimi “Generation Award” është dizajnuar për t’i festuar aktorët e dashur kontributet e ndryshme të së cilëve në film dhe televizion i kanë bërë ata emra të shquar anembanë botës.

Ndër yjet e tjerë të nderuar me këtë çmim janë: Sandra Bullock, Tom Cruise, Jamie Foxx, Dwayne ‘The Rock’ Johnson, Will Smith dhe Reese Witherspoon.

Ylli i filmit “Lost in Translation” në të kaluarën ka qenë e nominuar gjashtë herë për shpërblim “MTV Movie & TV Awards”, kurse në vitin 2013 triumfoi në kategorinë “Përleshja më e mirë” për performancën e shkëlqyer në filmin “The Avengers”.

Lajmi për vlerësimin e Johanssonit vjen një javë pasi “MTV” njoftoi se çmimi special, “Gjeni i Komedisë”, këtë vit do t’i ndahet aktorit Sacha Baron Cohen.

Ylli i filmit “Borat” do të jetë aktori i katërt që e ka pranuar këtë shpërblim, derisa yjet e nderuar si “Gjeni të Komedisë” në të kaluarën ishin: Will Ferrell, Kevin Hart dhe Melissa McCarthy.

“MTV” e ka përzgjedhur Cohenin për këtë shpërblim ngase kanë dashur ta nderojnë një aktor i cili ka bërë kontribut të pakrahasueshëm në botën e komedisë, duke shënuar ndikim të madh përmes punës së tyre dhe e duke transformuar zhanrin në përgjithësi.

Edhe Showbiz 23 qer 2021 Scarlett Johansson do ta pranojë shpërblimin “American Cinematheque Award”

Sacha Baron Cohen po ashtu është nominuar në tri kategori të ceremonisë. Projekti i tij i fundit “Borat Subsequent Moviefilm” garon për çmimin “Filmi më i mirë”, dhe aktori bashkë me kolegen e tij Maria Bakalova janë nominuar në kategorinë “Dyshja më e mirë në film”. Ylli 49-vjeçr i kinematografisë po ashtu ka marrë nominim për çmimin “Performanca më e mirë” për rolin e tij në dramën “The Trial of the Chicago 7”.

Kurse seriali i platformës Disney+, “WandaVision”, në të cilën luajnë aktorët Elizabeth Olsen dhe Paul Bettany, kryeson me pesë nominime gjithsej, përfshirë këtu kategoritë “Seriali më i mirë”, “Heroi më i mirë”, “Performanca më e mirë në serial” dhe “Përleshja më e mirë”.

Ceremonia e ndarjes së çmimeve do të mbahet më 16 maj në teatrin “Palladium” të Los Angelesit, dhe do të prezantohet nga aktorja komike Leslie Jones.