Sabrina Carpenter: Jam e shkëputur dhe me mendësi të vjetër

Këngëtarja Sabrina Carpenter ka treguar se jeton një stil jete të pazakontë për një yll të muzikës, duke e përshkruar veten si e shkëputur dhe “old school” (me mendësi të vjetër).

Artistja 26-vjeçare ka thënë për revistën Interview se nuk ka as televizor në apartamentin e saj.

“Nuk jam një vajzë televizori. Nuk kam fare TV në shtëpi. Tingëllon sikur jam e shkëputur dhe ‘old school’, por kur jam aty, thjesht dëgjoj muzikë”, u shpreh ajo.

Carpenter e ka përshkruar veten si “shpirt i vjetër muzikor”, pasi që në fëmijëri është rritur duke dëgjuar këngë nga dekada të mëhershme.

“Është e vetmja gjë që di të dëgjoj. Me këtë jam rritur. Kohët e fundit po dëgjoj shumë ‘Blue Nile’. Vitet ’70 më japin shumë ngushëllim. Dashuria ime për bende si ‘Fleetwood Mac’ dhe ‘ABBA’ është e pafundme, por po argëtohem shumë duke zbuluar albume të reja”, ka thënë ajo.

Ani se ka arritur sukses të madh në vitet e fundit, këngëtarja ka theksuar se nuk është ndjerë nën presion gjatë punës për albumin e saj të ri, “Man’s Best Friend”.

“Ka kohë që e bëj këtë punë. Nganjëherë është e mirë, nganjëherë jo. Ekziston ideja se kur arrin një pikë të caktuar, ndjen presion dhe fillon të mendosh tepër. Por unë mendoj se nuk është ndryshe nga hera e fundit. Askush nuk më tha se duhej ta nxirrja albumin në një datë të caktuar. Nëse ndihesha e frymëzuar, thjesht shkruaja”, ka treguar ylli.

Pas suksesit të albumit të kaluar, “Short n’ Sweet”, ajo u ndje edhe më e afërt me publikun.

“Pata shumë fat që njerëzit u lidhën me albumin e kaluar ashtu siç ndodhi. Kjo më bëri të shkruaj edhe më shumë, sepse u ndjeva më e kuptuar. Përderisa këngët janë të sinqerta për mua, kjo është ajo që ka rëndësi”, ka shtuar ajo.