-
Përktheu:
Vita Abrashi-Kajtazi
- 8 shtator 2026 09:45
- Shpërndaje në:
Aktorja Pamela Anderson ka rrëfyer se diagnoza me hepatit C në fund të viteve ’90 e ndryshoi rrënjësisht jetën e saj. Në atë kohë, mjeku i kishte thënë se mund të kishte vetëm rreth 10 vjet jetë, ka shkruar FemaleFirst.
“Ishte një dënim me vdekje. Mjeku më tha se ndoshta kisha rreth 10 vjet jetë”, ka thënë Anderson në ngjarjen gala të “amfAR” në Venecia, ku u nderua me Çmimin e Kurajës.
Ajo ka thënë se frika për të ardhmen e dy djemve të saj, Brandon dhe Dylan, ndikoi edhe në vendimet që mori në jetë.
“Nuk ishte frika nga vdekja, por frika për atë që mund t’u ndodhte fëmijëve të mi të vegjël. Kjo ma përmbysi jetën”, ka thënë ajo.
Një trajtim kurues për hepatitin C u bë i disponueshëm vite më vonë dhe, në vitin 2015, Anderson njoftoi se ishte shëruar. Por trajtimi kishte një kosto të lartë.
“Më kushtoi gjithçka që kisha në bankë për të paguar trajtimin”, ka thënë ajo.
Anderson ka pranuar gjithashtu se për vite me radhë e kishte shoqëruar diagnozën me turp dhe faj, ndjenja që thotë se ende e ndjekin.
“Më dukej sikur e kisha të gdhendur në ballë: ‘Mall i dëmtuar’. Dhe unë e paraqita veten si të tillë”, ka thënë aktorja.
Megjithatë, sot ylli ka thënë se e ka kthyer atë përvojë të dhimbshme në forcë dhe frymëzim për punën e saj artistike.
“Unë nuk jam viktimë, jam fitimtare. Jam e fortë dhe e aftë, më shumë nga sa mund ta kisha imagjinuar. Nuk jam vajza në ankth, sado e lehtë të jetë të luash atë rol”, ka thënë Anderson.
Në galan, e organizuar nga regjisori Taika Waititi, u nderua gjithashtu artistja Marina Abramović. Në mbrëmje pati performanca muzikore dhe një ankand bamirësie.