Kylie Minogue me koncerte në Las Vegas

Kylie Minogue për herë të parë do ta mbajë një seri koncertesh rezidente në Las Vegas, si performuesja kryesore e klubit të ri “Voltaire”.

Duke filluar nga 3 nëntori, ylli i hitit “Padam Padam” do të performojë këngë nga albumi i saj i ardhshëm, “Tension”, dhe hite të vjetra por shumë të pëlqyera nga publiku si, “Can’t Get You Out Of My Head” dhe “All The Lovers”, në sallën e cila i përmban 1 mijë ulëse.

“Jam e lumtur për këtë. Kur po flas me miqtë dhe familjen time, ata po shprehen jashtëzakonisht të entuziazmuar për këtë shou dhe po e shohin si arsye të mirë për të ardhur në Las Vegas. Mendoj se shumë prej historive nga Vegasi, fillojnë pikërisht me një arsye specifike e më pas përfundojnë në një eksperiencë të paharrueshme. Unë personalisht mezi po pres të kalojë kohë në qytetin e dritave, fillimisht për ta krijuar këtë eksperiencë unike e më pas për të tu kujdesur për argëtimin e publikut në ‘Voltaire’. Prandaj, mendoj se gjithçka do të shkojë mirë dhe sipas planifikimit”, deklaroi këngëtarja.

Me lokacion në hotelin “Venetian Resort”, lokali i natës i udhëhequr nga Michael Gruber, “Voltaire”, po ashtu do të ofrojë program argëtues nga DJ- të ndryshëm, shfaqje kabare, burleske etj.

Biletat për koncertet e pop-yllit australian, Kylie Minogue, do të dalin në shitje nga 9 gushti.