-
Përktheu:
Vita Abrashi-Kajtazi
- 23 maj 2025 15:23
- Shpërndaje në:
Meryl Streep dhe Emily Blunt pritet të kthehen në role
Është konfirmuar zyrtarisht: filmi ikonik “The Devil Wears Prada” do të rikthehet në kinema më 1 maj të vitit 2026, nën produksionin e Disney, ka raportuar Variety.
Lajmi për vazhdim të filmit u bë publik për herë të parë në muajin korrik të vitit të kaluar, por tani është zyrtarizuar edhe data e premierës. Edhe pse është raportuar se aktoret Meryl Streep dhe Emily Blunt do të rikthehen në rolet e tyre, studioja nuk ka konfirmuar ende zyrtarisht asnjë emër nga aktorët që kanë luajtur në film më herërt.
“E di që po punojnë për të. Nëse ndodh, do të isha shumë i lumtur, por nuk mund të jap asnjë informacion. Përndryshe do të më çojnë në burgun e aktorëve apo diçka e tillë. Filmi ishte një nga përvojat më të mira ndonjëherë”, ka thënë për Variety aktori Stanley Tucci, i cili luajti redaktorin e modës Nigel në filmin e parë.
Një rikthim në botën e modës (dhe manipulimit)
Filmi i vitit 2006, i bazuar në romanin bestseller të Lauren Weisberger, tregonte historinë e Andrea Sachs (rolin e së cilës e luante aktorja Anne Hathaway), një gazetare e re që punësohet si asistente e fuqishmes me karakter të ftohtë, Miranda Priestly (rolin e së cilës e luante aktorja Meryl Streep), redaktore e revistës së modës Runway, perzonazhi i së cilës është i frymëzuar nga vetë Anna Wintour, kryeredaktorja e prestigjiozes Vogue. Aktorja Emily Blunt interpretonte asistenten e parë të Priestlyt, ndërsa Stanley Tucci ishte Nigel, redaktori veteran që e fut Andrean në botën glamuroze dhe mizore, të modës.
“Një milion vajza do të vrisnin për këtë punë”, i thuhet Andreas kur ajo hyn në zyrën e Runway me dosjen e saj të artikujve… por pa asnjë sens për modën.
Çfarë dihet për vazhdimin?
Sipas raportimeve të para, vazhdimi do të fokusohet në Miranda Priestlyn ndërsa përballet me rënien e botimeve tradicionale të revistave dhe sfidën e karakterit të Blunt, e cila tani është një ekzekutive e fuqishme në një konglomerat luksoz, pikërisht një grup që kontrollon reklamat që Priestly ka aq shumë nevojë për to.
Planet e tjera të Disney-t
Në të njëjtën kohë, Disney ka bërë ndryshime të mëdha në kalendarin e publikimeve. Dy filmat e ardhshëm serisë së filmave “Avengers”, “Avengers: Doomsday” dhe “Avengers: Secret Wars”, janë shtyrë.
Gjithashtu, është vendosur që filmi “The Dog Stars” nga regjisori legjendar Ridley Scott, të shfaqet më 27 mars 2026.
Ndërkohë, në pritje të filmit “Avatar: Fire and Ash” që do të dalë më 19 dhjetor 2026, Disney do të risjellë në kinema filmin “Avatar: The Way of Water” në format IMAX/3D më 3 tetor, ashtu siç bëri me filmin e parë në prag të vazhdimit të tij.
