Festivali i njohur i muzikës, “Coachella”, zyrtarisht do të rikthehet në prill të vitit 2022.
Edicioni i radhës i ngjarjes shumë të ndjekur nga publiku, “Coachella Valley Music and Arts Festival”, do të jetë i pari nga viti 2019.
Të martën më 1 qershor, organizatorët e festivalit e bënë të ditur lajmin se po rikthehen dhe që edicioni i ri i tij, do të mbahet në fundjavat e 15-17 prillit dhe 22-24 prillit të vitit 2022, në Kaliforni.
Në këtë mënyrë u konfirmuan raportimet e mëhershme se festivali i famshëm nuk do të mbahej gjatë këtij viti. Fansat tani kanë mundësi të regjistrohen në uebfaqen zyrtare të “Coachella”, për të pasur qasje në shitjet e hershme të biletave për koncertet e vitit 2022.
“Coachella”, i cili u detyrua të shtyhej 2 herë si pasojë e pandemisë, planifikohej të mbahej në prill të këtij viti, por shpresat që një gjë e tillë të ndodhë u shkatërruan në muajin janar, kur zyrtari i shëndetit publik i ngarkuar me qarkun Riverside, ku tradicionalisht mbahet festivali, e nënshkroi një urdhër të shëndetit publik që anulonte këtë ngjarje dhe festivalin simotër të muzikës country, “Stagecoach”.
Në edicionin e vitit 2020 të festivalit “Coachella” do të performonin yjet e njohur të muzikës, si Frank Ocean, bendi “Rage Against the Machine”, Travis Scott, Lana Del Rey, Lil Uzi Vert, Thom Yorke, dyshja e muzikës “Run the Jewels”, FKA twigs, DaBaby, 21 Savage, Lil Nas X dhe të tjerë.
Edhe
Frank Ocean do të rikthehet në festivalin “Coachella” në vitin 2023
Disa festival tjera të Amerikës që po rikthehen së shpejti janë: festivali i organizuar nga reperi Jay-Z, “Made In America Festival”, i cili rikthehet në muajin shtator, dhe grupi “Slipknot” po e risjell festivalin “Knotfest Iowa” në të njëjtin muaj.
Ndërkohë, Billie Eilish, Stevie Nicks dhe Miley Cyrus e kanë konfirmuar pjesëmarrjen e tyre në festivalin, “Austin City Limits”, që mbahet në tetor të vitit 2021.
