-
Përktheu:
Vita Abrashi-Kajtazi
- 31 gusht 2026 09:37
- Shpërndaje në:
Aktorja Eva Mendes ka treguar se tatuazhi i saj i vetëm ka një domethënie të veçantë.
52-vjeçja ka publikuar në Instagram disa foto, ku shfaq edhe tatuazhin në pjesën e brendshme të kyçit të dorës, me mbishkrimin “de Gosling”, ka shkruar People.
Një ndjekës i saj e vuri re tatuazhin, ndërsa Mendes u përgjigj duke treguar se ka vetëm atë tatuazh.
“Është i vetmi tatuazh që kam dhe i vetmi që kam dashur ndonjëherë”, ka thënë ajo.
Shprehja “de Gosling” ka bërë që fansat të mendojnë se tatuazhi është një referencë për martesën e saj me Ryan Gosling. Në kulturën latino-amerikane, “de” përdoret për të lidhur mbiemrin e një gruaje me mbiemrin e bashkëshortit pas martesës.
Mendes dhe Gosling u njohën në vitin 2011 gjatë xhirimeve të filmit “The Place Beyond the Pines” dhe prej vitesh e mbajnë jetën private larg vëmendjes së publikut. Në vitin 2022, Mendes iu referua Gosling si “burri im” gjatë një interviste televizive.
Çifti ka dy vajza, Esmeralda, 11 vjeçe, dhe Amanda, 10 vjeçe. Së fundmi, familjes iu bashkua edhe një qen i quajtur Charlie.
Pavarësisht angazhimeve të shumta, Mendes ka treguar se ajo dhe Gosling përpiqen të kalojnë rregullisht kohë bashkë.
“Dalim rregullisht në mbrëmje”, ka thënë ajo, duke shtuar me humor se u pëlqen të shkojnë në kinema.
Për jetën e tyre private, Mendes ka thënë se kush nuk do vëmendje e di se ku të shkojë.
“Nëse do vëmendje, shkon në vende të caktuara, dhe nëse nuk e do, e di se ku duhet të shkosh. Ne zgjedhim këtë të fundit”, ka thënë ajo.