Ed Sheeran paralajmëron pauzën dhe ende shpreson për kolonën zanore të Bondit

Ed Sheeran nuk i ka humbur shpresat për ta regjistruar kolonën më të fundit zanore të Bondit për filmin “No Time To Die”.

Këngëtari i hitit “Perfect” e ka paralajmëruar një pushim 18-mujor pasi që i ka përfunduar koncertet në turneun e tij rekord-thyes Divide World Tour, por menaxheri i tij, Stuart Camp, insiston që kantautori do të kthehet përsëri në studio nëse drejtuesit e filmit për Bondin dëshirojnë që ai ta regjistrojë kolonën zanore për filmin e tyre të radhës.

Camp tha për “Music Week” se është takuar me producenten e 007, Barbara Broccoli në Dublin në vitin 2017 dhe se ajo ishte "e interesuar" që t’i kërkojë Edit ta regjistronte kolonën zanore për filmin, i cili atëherë titullohej Bond 25, shkruan KOHA Ditore.

"Regjisori Danny Boyle u ndërlidh me filmin pas kësaj, regjisor ky që e bëri regjinë e filmit Yesterday, kështu që u krijua një lidhje e ngushtë," tha Camp, duke iu referuar rolit të Sheeran në në filmin me tematikë të Beatlesave. "Ata i ndërruan regjisorët, por akoma jemi të hapur për këtë. Por ata nuk po i bëjnë më ato biseda".

Sheeran dëshiron ta bëjë atë dhe po e pyet menaxherin e tij çdo ditë për ndonjë lajm të ri.

"Unë i them që gjëja e fundit që e bëjnë është muzika...", shtoi Camp. "Kjo është sigurisht diçka që ai do të dëshironte të bënte. Është në listën e tij të dëshirave që dëshiron t’i realizojë".