Pas performancës në “BST Hyde Park”, “BLACKPINK”, ka bërë histori si grupi i parë i muzikës K-Pop që shërben si performues kryesor i një festivali madhështor në Britani të Madhe
Grupi i përbërë nga 4 vajza i performoi gjithsej 17 këngë, duke e elektrizuar skenën dhe duke argëtuar 65 mijë fansat që kishin blerë biletat enkas për këtë grup.
Duke u prezantuar si kurrë më parë para publikut londinez, Jennie, Jisoo, Rosé dhe Lisa, e filluan koncertin me hitet e tilla si, “Pink Venom”, “How You Like That”, “Pretty Savage” dhe “Kick It”, para se të kalonin tek kënga e tyre debutuese “Whistle”, me të cilën e fituan famën ndërkombëtarisht në vitin 2016.
Katër pjesëtaret e grupit sollën shumë energji në skenë për plot 90-minuta, duke mahnitur me koreografitë e njëpasnjëshme dhe ndryshimet e veshjeve. Gjatë koncertit, Rosé deklaroi: “Jemi absolutisht të nderuara që po performojmë këtu në Hyde Park… Për ne kjo është një ëndërr e shndërruar në realitet!”
Përveç hiteve të grupit, vajzat nuk hezituan t’i interpretojnë edhe këngët e tyre të realizuara si solo artiste. Jennie e këndoi hitin “You & Me”, Jisso e interpretoi këngën “Flower”, Rose e solli një performancë fantastike të “Gone + On The Ground” dhe në fund turma u argëtua me interpretimin e hitit “Money” nga Lisa.
Para se grupi i muzikës K-Pop të dilte në skenë për publikun performuan edhe artistët, Rebecca Black, The Rose, Sabrina Carpenter dhe të tjerë.
Disa prej emrave që janë pjesë e festivalit të sivjetmë “BST Hyde Park” janë: grupet “Guns N’ Roses” dhe “Take That”, këngëtarja amerikane P!nk, dhe ikonat e muzikës, Billy Joel dhe Bruce Springsteen. Në mbrëmjen finale skenën do ta hijeshojë ylli, Lana Del Rey, e cila e përmbyll festivalin me një performancë speciale më 9 korrik.
Përgatiti: Edona Binaku
