Ylli i kinematografisë, Will Smith, ka folur për incidentin në ceremoninë e fundit “Oscar”, gjatë të cilës e qëlloi me shuplakë komedianin Chris Rock.
Smith për emisionin “The Daily Show/Comedy Central” me Trevor Noahn, ka thënë se kurrë nuk mund ta dish se çfarë kalon njeriu tjetër.
Ai ka thënë se nuk dëshiron ta justifikojë sjelljen e tij, porse po kalonte gjëra atë natë.
“Në fund të ditës, e humba kontrollin. Ajo që dua të them, kurrë nuk e di se çfarë po kalon një person tjetër. Po kaloja diçka atë natë, jo se dua ta justifikoj sjelljen time. E kam mësuar se duhet të sillemi mirë me njëri-tjetrin. Është e vështirë. E kam mësuar atë thënie se ‘njerëzit e lënduar lëndojnë njerëz’. Atë vështirësi që e kisha e barta te tjerët. Nuk dua të jem i tillë. Nuk jam i tillë”, ka thënë Smith.
Smith ka shtuar se është “dashur ta falë veten se është vetëm njeri”.
Will Smith e fitoi çmimin e parë “Oscar” në kategorinë “Aktori më i mirë”, për performancën e shkëlqyer në filmin biografik “King Richard”, edicionin e fundit. Pasi i bëri disa falje publike rreth reagimit të tij skandaloz në ceremoni, aktori vendosi të heq dorë nga anëtarësimi në Akademinë e Arteve dhe Shkencave. Ai po ashtu nuk ka të drejtë të marrë pjesë në këtë ngjarje prestigjioze të kinematografisë, për 10 vjetët e ardhshëm.
