Koncerti i fundit virtual i Dua Lipës, “Studio 2054”, ka thyer rekordin e shikueshmërisë online, me më shumë se pesë milionë shikime.
Ngjarja muzikore e cila u transmetua live në vende të ndryshme të botës, mbi 1.9 milionë shikime i ka arritur në Kinë, rreth 100 mijë nga India dhe më shumë se 260 mijë bileta të koncertit ishin shitur nëpër platformat e rregullta të biletarisë, transmeton Koha.
Koncerti i mbushur me performanca energjike të këngëtares me prejardhje kosovare, Dua Lipa, i përfshiu edhe paraqitjet e këngëtarëve mysafir si, Miley Cyrus, Elton John, Kylie Minogue, FKA Twigs dhe të tjerë.
“Jam më se e lumtur t’iu njoftoj se koncerti i së premtes, ‘Studio 2054’ i ka arritur më shumë se 5 milionë shikime anembanë botës!!! Faleminderit shumë të gjithëve që jeni kyçur online për ta ndjekur atë”, ka shkruar Lipa në një mesazh të postuar në Twitter.
I am BEYOND excited to let you know that Studio 2054 had over 5 MILLION viewers globally on Friday night !!! - thank you so much to everyone for tuning in!! ?✨?I’m also so happy to announce that we’ve kept the show available to watch until Sunday ‼️‼️‼️https://t.co/GeQCKcWavN pic.twitter.com/3nF6klFMmU
— DUA LIPA (@DUALIPA) November 30, 2020
Për shkak të kërkesave të larta, transmetimi i koncertit të Duas do të jetë në dispozicionin e publikut deri të dielën më 6 dhjetor, dhe çmimi i biletave për ta shikuar koncertin vazhdon të jetë 7.50 funte.
“Jam veçanërisht krenar me Duan dhe ekipin e madh të cilët kanë punuar prapa kësaj performance të jashtëzakonshme. Ishte shumë e rëndësishme për Duan që ta krijonte diçka përtej kufijve të një shou të zakonshëm live, dhe ajo e arriti këtë gjë me koncertin ‘Studio 2054’. Sa i përket shikueshmërisë, ne e dinim se do të ishte e vështirë ta përcaktonim numrin e saktë të ndjekësve për shkak të faktit se ishte një koncert i transmetuar live në një treg të ri që po zhvillohet ende. Prandaj është shumë emocionuese që ajo ka arritur ta shënojë një shikueshmëri kaq të madhe. Ne llogarisim se koncertin e kanë ndjekur më shumë se 5 milionë njerëz, por ky numër mund të jetë edhe më i madh, afërsisht 8 apo 9 milionë. Ishte një ngjarje masive dhe jam krenar për faktin se Dua, edhe një herë e dëshmoi veten si një prej pop yjeve më të mëdhenj të botës”, ka deklaruar Ben Mawson nga kompania “TaP Music”.
Koncerti u transmetua live në orë të ndryshme varësisht prej territoreve, ku përfshiheshin edhe shtetet e Ballkanit si: Kosova, Shqipëria, Maqedonia e Veriut dhe Serbia.
Përgjatë koncertit i cili zuri vend në një depo të Londrës, Lipa performoi e shoqëruar nga disa muzikantë, valltarë, akrobat të ndryshëm, dhe këngëtarët mysafirë. Ajo po ashtu i ndërrojë disa kostume dhe skenat ku performoi ndryshonin nga njëra-tjetra, duke u përshtatur me këngët që këngëtarja kishte zgjedhur t’i interpretojë. Lipa kishte vendosur t’i kthehet edhe hiteve të saja të mëparshme dhe natyrisht, për herë të parë i performoi live disa prej këngëve të albumeve, “Future Nostalgia” dhe “Club Future Nostalgia”.
“Studio 2054” ishte një mbrëmje e mbushur me muzikë, performanca, aktrim, vallëzim dhe shumëçka tjetër. Të gjitha këto të bashkuara i ofruan shikuesit një përvojë multi-dimensionale të drejtpërdrejtë. Kështu Dua Lipa u bë ylli i fundit i muzikës që iu ofroi adhuruesve mundësinë ta shohin duke interpretuar live në këtë kohë kur koncertet fizike janë pezulluar anembanë botës, si pasojë e koronavirusit.
