Me një butësi dhe përkushtim, të dyja motrat, Emma dhe Sara filluan të luanin në instrumentet e tyre.
Që kur ishin shumë të vogla, ato kishin treguar dashuri dhe interesim të madh për muzikën. Kështu që të dyja kanë mësuar të luajnë në instrumentet që preferojnë më së shumti. Emma luante në flautë, kurse Sara në piano.
Të dyja së bashku krijonin tinguj të mrekullueshëm me njëra tjetrën dhe koordinoheshin aq mirë duke interpretuar vepra të shumta. Edhe pse luajnë në instrumente të ndryshme, ato gjithmonë gjejnë mënyra dhe vepra muzikore ku mund të përfshijnë të dyja instrumentet.
Përveç talentit që kanë për të interpretuar në flaut dhe piano, Emma dhe Sara kanë realizuar një këngë së bashku, që titullohet “Gjyshes hyjnore”. Këtë këngë ato ia dedikuan gjyshes së tyre, e cila nuk jeton më. Teksti i kësaj kënge është shkruar nga nëna e vajzave, Teuta Perlaska – Quni, ndërkaq kompozimi dhe orkestrimi është bërë nga Ilir Thaqi. -Emma dhe Sara me interpretimet e tyre dhurojnë shumë emocione. Prandaj në të ardhmen pritet që të dyja së bashku të arrijnë suksese të mëdha si instrumentiste dhe këngëtare të talentuara.
© KOHA. Të gjitha të drejtat janë të rezervuara.
