Banorët e fshatit Gllogovicë kërkojnë transport publik
Mëngjesi i së martës nisi me një protestë para Komunës së Prishtinës, në të cilën banorët e Gllogovicës kërkuan transport publik për fshatin e tyre. Sipas banorëve, në mungesë të një linje të autobusit, shumë nxënës nuk kanë vazhduar shkollimin e mesëm. Komuna e Prishtinës pati një lajm të mirë për ta.
Dhjetëra banorë të fshatit Gllogovicë, mëngjesin e së martës kanë protestuar para Komunës së Prishtinës për mungesë të linjës së Trafikut Urban.
Linja 15 e autobusit e cila operon deri në fshatin Prapashticë, nuk vazhdon edhe për 6 kilometra të tjera deri në fshatin e këtyre banorëve, të cilët përmes protestës kërkuan zgjidhje nga kryetari i Prishtinës, Përparim Rama.
Përveç vështirësive të tjera, mungesa e linjës së autobusit, sipas tyre, po ua pamundëson edhe vazhdimin e shkollimit shumë fëmijëve të këtij fshati.
“Më skandalozja, më e keqja për ne është se në atë fshat ka mbi 15 nxënës që e kanë mbaruar shkollën fillore dhe për shkak të kushteve të rënda ekonomike e posaçërisht për mungesë të transportit publik është dashur të largohen nga shkolla dhe të mbesin në shtëpi. Ndihen shumë keq e bashkë me ta edhe prindërit e tyre”, ka thënë Asllan Bekteshi, përfaqësues i fshatit Gllogovicë.
“Besoj që dikush do të jep përgjegjësi pse ata nxënës kanë mbetur pa mësim? Pse të mos vazhdohet ajo linjë për 4-5 kilometra. Ka nxënës, ka të rinj, ka të moshuar që duhet të ecin rreth 2 orë”, ka thënë banori i fshatit, Zenel Bekteshi.
“Këto vetura që i kemi, i kemi prishë, nuk mundemi me dalë, fëmija nuk mund të shkollohen, qysh? Te mjeku nuk mund të shkojmë. 25 për qind e territorit është Gollak, ne e japim votën këtu. Mos me qenë ne këta, krerët institucionalë nuk mund të dalin në krye të detyrës”, u shpreh banori tjetër, Selim Demolli.
Para tyre doli drejtori i Shërbimeve Publike i Komunës së Prishtinës, Ilirik Musliu, i cili ua dha një lajm të mirë protestuesve.
“Kërkesa për të pasur transport publik për tek ju është aprovuar. Sot do të kemi një mbledhje me task-forcën dhe me Trafikun Urban, sepse ky është një investim i BERZH-it. Na duhet të bëjmë rimodelimin e linjave të Trafikut Urban. Më vjen keq që po takohemi sot të flasim për këtë punë, kur është dashur të takohemi për projekte më të mëdha”, ka thënë Musliu.
Protestës së tyre iu bashkuan edhe përfaqësues të fshatrave përreth, të cilët e kanë të njëjtin problem.
