Deputetja nga radhët e Vetëvendosjes, Fitore Pacolli, njëherit kryetare e Komisionit për Mjedis, Ushqim, Bujqësi, Planifikim Hapësinor dhe Zhvillim, është takuar sot me kryetarin e Prishtinës, Përparim Rama.
Pacolli në një postim në Facebook ka thënë se ia ka paraqitur Ramës shqetësimet që qytetarët e Prishtinës i kanë adresuar te Komisioni, veçanërisht për ndërmarrjen publike “Prishtina Parking”.
Pacolli ka thënë se “Prishtina Parking” po shkel të drejtat e qytetarëve në baza ditore përmes veprimeve të jashtëligjshme. Ajo ka bërë thirrje që të ndalohen aktivitetet e kësaj ndërmarrje, duke thënë se ajo po përfiton jashtëligjshëm në mënyrë të shumëfishtë duke shfrytëzuar hapësirat rezidenciale.
“Ne kërkuam që urgjentisht të ndërpritet shfrytëzimi i hapësirave rezidenciale për përfitim të shumëfisht. Prishtina Parking përfiton pagesë nga banorët rezidencial dhe në të njëjtën kohë i lëshon ato për shfrytëzim për ata jorezedencial. Parking Prishtina në mënyrë të jashtëligjshme përfiton nga të dy palët. Si dhe të ndërpritet shqiptimi i dënimeve, vendosja e bllokadave, konfiskimi i veturave nga Prishtina Parking dhe pranimi i pagesës së dënimeve me para në dorë pa u definuar saktë kompetencat e Prishtina Parking. Prishtina Parking përfiton para nga këto dënime ndërsa transparenca se ku përfundojnë këto para është zero. Ne kërkuam që të pezullohet zgjerimi i Prishtina Parking deri në përmirësimin e mangësive dhe ndryshimin e rregullores. Ne kërkuam nga kryetari që të na jap qasje në këto dokumente: 1. Autorizimin për bllokimin dhe e veturave me të cilin vepron "Prishtina Parking"; 2. Rregulloret e brendshme të ndërmarrjes; 3. Të gjitha dokumentet nga Drejtoria e Kadastrit që vërtetojnë të gjitha parcelat për shfrytëzimin e hapësirave nga "Prishtina Parking"; 4. Dokumentat që definojnë karakterin e rrugës "B", në veçanti shiritat anësor. Kryetari pranoi kërkesat tona dhe na premtoi se shqetësimet e qytetarëve do të adresohen”, ka shkruar Pacolli në Facebook.
© KOHA. Të gjitha të drejtat janë të rezervuara.
