Ahmeti: Ende s’kemi pranuar vendim zyrtar nga Ministria për anulimin e projektit në Badovc

Kryetari i Prishtinës, Shpend Ahmeti, ka thënë se ende nuk kanë pranuar vendim zyrtar nga Ministria e Ambientit rreth anulimit të kushteve ndërtimore për projektin në Liqenin e Badovcit.

Ahmeti ka thënë për KTV-në se një vendim të tillë eventual do ta shqyrtojnë, por ka theksuar se në rast të anulimit të kushteve përgjegjësia ligjore i takon ministrisë.

“Nuk po e di vendimin por e shqyrtojmë si ta marrim. Me rëndësi për neve ka qene që Komuna ka vepruar sipas ligjit dhe sipas vendimeve të shkallës së dytë. Tash i krahasojmë edhe me vendimet e tjera dhe e përpilojmë vendimin tonë gjithmonë duke i mbrojtur interesat e Komunës së Prishtinës dhe duke qenë të qartë që përgjegjësinë ligjore e merr Ministria. Nuk mendoj që ka rrezik nga ndërtimi edhe ashtu sepse pa pëlqim mjedisor ato nuk vlejnë e që po supozoj ka me thënë vendimi që pëlqimi duhet me u marr para kushteve e që në ligj shkruan që duhet para aplikimit për leje”, ka thënë Ahmeti për KTV.

Ministri i Infrastrukturës, Lumir Abdixhiku ka marrë një tjetër vendim të rëndësishëm që do të bëhet publik nesër.

Sipas burimeve të KTV-së, Ministri e ka urdhëruar komunën e Prishtinës që të anulojë kushtet ndërtimore për ndërtimin e lagjes së shumëpërfolur në afërsi të Liqenit të Badovcit.

Kundër ndërtimit të saj ishte mobilizuar shoqëria civile, e cila kishte ngritur alarmin për mungesën e pritshme të ujit.

© KOHA. Të gjitha të drejtat janë të rezervuara.