Ahmeti thotë se situata pas shembjes së dheut është nën kontroll

Ahmeti sqaron pse tha se nëse ndal ndërtimet ose “do të burgoset ose do të vritet”

13 May 2019 23:34
23:47

Kreu i Prishtinës, Shpend Ahmeti, është shprehur se i është keqinterpretuar deklarata se nëse ndal ndërtimet në kryeqytet, ose do të jetë në burg ose i vrarë.

E ka akuzuar Vetëvendosjen që me qëllim ia nxjerri prej kontestit këtë deklaratë.

“Është keqpërdorë shumë. Ka qenë një diskutim publik ku unë kam shkuar për t’i dëgjuar arkitektët se çfarë po thonë. Ka qenë një simbolikë sepse ka ndodhur në rrugën ‘Rexhep Luci’. Nëse deri në vitin 2013 kanë qenë problem ndërtimet pa leje, tash janë problem ndërtimet me leje. Unë i kam 5 padi. Ju thash unë, që po të më pyesni mua do të bënim moratorium për krejt ndërtimet në Prishtinë. Në të kundërtën unë do të përfundojë ose në burg ose i vrarë”, ka thënë Ahmeti në Interaktiv të KTV-së.

I pyetur se pse e ka bërë këtë deklaratë, Ahmeti ka shpeguar vetëm për këtë të parën.


Lexoni edhe: 

Ahmeti thotë se platforma s’i pëlqeu Mogherinit, “i thash ftesat t’i dërgohen Kosovës pa emër”


“Me ligjet aktuale në Kosovë nuk ke të drejtë t’ia ndalësh ndërtimet. Me Ligjin mbi Ndërtimet, që Kuvendi e ka marrë prej Gjeorgjisë, 45 ditë nëse nuk i jep leje dikujt konsiderohet se ai ka leje. Gjithçka është bërë në favor të atyre që bëjnë ndërtime. Ne si Komuna vetëm mund t’i zbatojmë ligjet”, ka thënë Ahmeti, përcjell Koha.net.

Ai ka thënë se shansi i Prishtinës është te hartat zonale, që t’i jepet një zhvillim Prishtinës.

“Unë mendoj se në qendër nuk më vend për ndërtime. Në Prishtinë, nga viti 1999 janë investuar 2.5 miliardë euro në ndërtime, ndërsa janë investuar në infrastrukturë vetëm 180 milionë euro. Ndërsa llogaritet që për 3 euro investim në ndërtim, 1 euro të investohet në infrastrukturë, dhe ne po mundohemi që vazhdimisht ta zëmë hapin”, ka thënë Ahmeti.

Ahmeti ka sqaruar edhe problemin me ndërtimet në oborrin e Katedrales.

Ka thënë se kanë humbur në të gjitha fazat e gjyqësisë.


Lexoni edhe: 

Ahmeti: PSD-së nuk i konvenojnë zgjedhjet, por qeverinë duhet ta rrëzojmë


“Kemi humbur edhe në Supreme. Unë kam vendosur që t’i heqim, sepse kemi vendim të natyrës së prerë”, ka thënë Ahmeti.

Ai ka thënë se as Katedralja, sikurse as Xhamia e Madhe, nuk do të mund të bëjnë dyqane komerciale në hapësirat e tyre.

“Do të angazhohemi që bashkë me Katedralen të krijojmë një hapësirë të gjelbëruar”, ka thënë Ahmeti.

23:34

Ahmeti thotë se situata pas shembjes së dheut është nën kontroll

Shpend Ahmeti, kryetar i Prishtinës, ka thënë se situata në lagjen e Muhaxherëve është nën kontroll pas shembjes së dheut që ndodhi nga mbrëmë për shkak të një gypi të Ujësjellësit që kishte shpërthyer.

Ai ka thënë se janë dërguar shumë kamionë zhavorr për të forcuar hapësirën pasi që të martën pritet të ketë reshje shiu. Ka bërë të ditur se mësimi do të vazhdojë në shkollën “Naim Frashëri”.

“Në një ndërtim aty, një gyp i ujësjellësit ndoshta me fajin edhe të kompanisë, kishte shpërthyer. Uji ka hy nën dhe, dhe ka krijuar një hapësirë. Shtyllat janë aty, por për shkak të sigurisë i kemi larguar banorët nga katër shtëpi, një ishte e banueshme. Edhe ato shtëpi do të largohen së shpejti për ndërtim. Ka qenë një kran i lartë më i rrezikshëm e kemi kërkuar të evakuohen nxënësit nga ‘Naim Frashëri’ për çdo rast. Tashmë janë dërguar 200 kamionë zhavorr sepse nesër pritet reshje shiu e bëhet më problematike”, ka thënë ai në Interaktiv të KTV-së.

Ka thënë se janë pezulluar ndërtimet në atë pjesë përkohësisht.

Ai ka folur edhe për shpërthimin e gypit të furnizimit të dielën në qendër të qytetit. Ka thënë se, sipas ujësjellësit, problemi ka ardhur për shkak se gjatë muajit të Ramazanit nuk ndalet shtypja fare natën dhe presioni është më i madh.

© KOHA. Të gjitha të drejtat janë të rezervuara.

Komentet

Shto koment

Të ngjashme