Urim Sadiku, vëllai i boksieres Donjeta Sadiku, është shpallur më i miri i turneut të boksit “Uniteti Boxing Cup 2025”.
Turneu i organizuar nga klubi i boksit Uniteti, u mbajt të dielën në sallën e boksit në Hotel Grand në Prishtinë.
Sadiku , që garon në kategorinë deri 70 kilogramë, mposhti boksierin e klubit Cellactive, Festim Maqastena.
Lufta ndërmjet Sadikut dhe Maqastenës u përcoll me shumë entuziazëm. E pranishme ishte edhe Donjeta Sadiku, që po ashtu përcolli me shumë emocione luftën e vëllait të saj, Urimit.
Urim Sadiku është në fillim të karrierës në boks, ndërsa Donjeta tashmë është boksiere e nivelit botëror. Ajo në vitin 2022 fitoi medalje të bronztë në Botëror dhe Evropian. Ka fituar medalje të rëndësishme edhe në kategori të reja.
17-vjeçari Urim Sadiku, pjesë e klubit të boksit Uniteti, vlerësohet me të ardhme.
Tekniku më i mirë u shpall Tugen Xhaferri. Epiteti i boksieres më të mirë i takoi Agnesa Veselit.