Zakoni i mëngjesit që mund të rrisë jetëgjatësinë

Mëngjesi vendos ritmin për gjithë ditën, prandaj mjekët këshillojnë që vakti i parë të jetë i shëndetshëm dhe i ngopshëm.

Për jetëgjatësi, kardiologia Lauren Dal Farra rekomandon që mëngjesi të përgatitet mbi tre shtylla ushqyese: proteina, yndyra të shëndetshme dhe fibra, ka shkruar EatingWell.

Kjo praktikë fillon me proteinat

“Shujta e mëngjesit e pasur me proteina është një nga mënyrat më të thjeshta për të mbrojtur metabolizmin dhe shëndetin afatgjatë”, ka thënë Dal Farra.

Proteinat mund të merren nga vezët, kosi i trashë, fasulet, djathi, salmoni i tymosur, madje edhe toni ose mishi i qurës.

Yndyrat e shëndetshme përfshijnë vajin e ullirit, avokadon, arrat, gjalpin e arrave dhe farat. Ndërsa fibrat vijnë nga drithërat e plota, frutat dhe perimet.

Edhe nëse dikush nuk han zakonisht mëngjes, ky parim vlen për shujtën e parë të ditës, pavarësisht orës.

Proteinat dhe yndyrat e shëndetshme stabilizojnë sheqerin në gjak

Luhatjet e mëdha të sheqerit në gjak që në mëngjes nuk janë të mira as për ndjesinë tuaj, as për shëndetin afatgjatë.

Sipas Dal Farrës, stabiliteti i sheqerit në gjak është thelbësor për mbrojtjen e zemrës dhe trurit me kalimin e viteve. 

Rritjet e shpeshta të sheqerit në gjak çojnë në nivele më të larta të insulinës, rrisin inflamacionin dhe stresin qelizor, duke përshpejtuar plakjen.

Mëngjesi është shujta që përcakton nivelin e sheqerit në gjak gjatë gjithë ditës.

Proteinat dhe yndyrat treten më ngadalë dhe ndihmojnë në ngadalësimin e përthithjes së karbohidrateve, duke e mbajtur sheqerin në gjak më të qëndrueshëm gjatë paradites.

Ndihmon në parandalimin e shtimit në peshë

Proteinat, yndyrat dhe fibrat punojnë së bashku për ta mbajtur trupin të ngopur më gjatë.

Kur ndiheni të kënaqur pas vaktit, është më e lehtë të ruani peshë të shëndetshme.

Shtimi në peshë me kalimin e moshës, sidomos te gratë, është lidhur me plakje më të shpejtë biologjike.

Fibrat mbështesin plakjen e shëndetshme

Bukë e bardhë, drithëra të ëmbëlsuara, palapetat e ushqime te tjera me brumë, janë zgjedhje të zakonshme për mëngjes.

Edhe pse çdo ushqim mund të ketë vendin e vet, konsumimi i shpeshtë i karbohidrateve të rafinuara është lidhur me shanse më të ulëta për plakje të shëndetshme.

Në të kundërt, karbohidratet e pasura me fibra nga frutat, perimet, bishtajoret dhe drithërat e plota shoqërohen me shëndet më të mirë me kalimin e viteve.

Një mënyrë e lehtë për të shtuar fibra në mëngjes është të hani tërshërë, tërshërë të përgatitur një natë më parë ose drithëra të plota pa sheqer.

Nëse jeni me nxitim, merrni një mollë, portokall ose dardhë, janë të pasura me fibra dhe të lehta për t’u marrë me vete.

Yndyrat e shëndetshme ulin inflamacionin

Jo të gjitha yndyrat janë të njëjta. 

Yndyrat e ngopura, që gjenden te gjalpi, krem djathi, ëmbëlsirat, salsiçet dhe proshuta, mund të përshpejtojnë plakjen qelizore.

Ndërsa yndyrat e shëndetshme, si ato nga avokado, vaji i ullirit, arrat, farat, salmoni i tymosur, harenga dhe vezët, mund të ndihmojnë në uljen e inflamacionit dhe stresit qelizor.

Zakone të tjera të mëngjesit që lidhen me jetëgjatësinë

Hani mëngjes më së pari

Studime të shumta kanë treguar se personat që e anashkalojnë mëngjesin kanë rrezik më të lartë për sëmundje të zemrës dhe sulm në tru. Edhe një shujtë e thjeshtë mëngjesi, si kos me pak arra, është më mirë se asgjë.

Shtoni fruta mali

Dredhëzat, boronicat, mjedrat dhe manaferrat lidhen me rrezik më të ulët vdekjeje nga çdo shkak. 

Kjo mendohet të vijë për shkak që përmbajnë shumë antioksidantë. 

Ato janë gjithashtu burim i mirë fibrash.

Përfshini ushqime me probiotikë

Kosi dhe kefiri përmbajnë baktere të mira që ndihmojnë shëndetin e zorrëve.

Flora e shëndetshme e zorrëve lidhet me më pak inflamacion dhe plakje më të ngadaltë biologjike.

Hani edhe perime në mëngjes

Konsumimi i pesë porcioneve fruta dhe perime në ditë lidhet me rrezik më të ulët nga vdekja, sidomos nga sëmundjet e zemrës dhe kanceri.

Ideale do të ishte të synoni tre porcione perime dhe dy fruta në ditë. 

Nëse filloni me një porcion perimesh që në mëngjes, jeni në rrugë të mbarë për të forcuar mbrojtjen natyrore të trupit.