-
Përktheu:
Vita Abrashi-Kajtazi
- 12 qershor 2026 22:29
- Shpërndaje në:
Mjekët po u bëjnë thirrje grave të moshës 40 deri në 65 vjeçe që të përfshijnë ushtrimet me peshëngritje në rutinën e tyre, pasi ato mund të përmirësojnë shëndetin e eshtrave, muskujve, humorin dhe cilësinë e jetës në përgjithësi, ka shkruar HuffPost.
Sipas doktoreshës Alexandra Dubinskaya, periudha e perimenopauzës dhe menopauzës sjell ndryshime të rëndësishme në organizëm.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Po kuptojmë gjithnjë e më shumë se çka ndodh gjatë perimenopauzës: ndryshimet në metabolizëm, humbja e muskujve, dobësimi i eshtrave dhe luhatjet e humorit”, ka thënë ajo.
Ekspertët theksojnë se ushtrimet me peshëngritje janë një nga mënyrat më efektive për t’i luftuar këto probleme. Ato ndihmojnë në rritjen e densitetit të eshtrave, forcimin e muskujve, përmirësimin e metabolizmit, uljen e rrezikut të rrëzimeve dhe përmirësimin e shëndetit mendor.
“Ushtrimet me peshëngritje janë një nga mënyrat më të rëndësishme dhe më pak të përdorura, me të cilat gratë mund të mbrojnë shëndetin dhe pavarësinë e tyre me kalimin e moshës”, ka thënë doktoresha Clarinda Hougen.
Rreziku për osteoporozë rritet pas menopauzës. Ekspertët vlerësojnë se një në tre gra mbi moshën 50-vjeçare përjeton fraktura të lidhura me osteoporozën, ndërsa gratë mund të humbin deri në 20 për qind të densitetit të eshtrave brenda pesë deri në shtatë vjetësh pas menopauzës.
“Ushtrimet me rezistencë janë një nga mjetet më efektive që kemi për ta ngadalësuar këtë proces pa përdorur ilaçe”, ka shtuar Dubinskaya.
Për fillestarët, ekspertët rekomandojnë ushtrime të thjeshta në shtëpi si ulje-ngritjet (squats), ngritjet në shkallë, pompat e modifikuara dhe ushtrimin që quhet “plank”. Më vonë mund të shtohen pesha të lehta ose shirita elastikë.
Mjekët këshillojnë gjithashtu konsumimin e mjaftueshëm të proteinave dhe ujit për të ndihmuar rritjen dhe rikuperimin e muskujve.
“Sigurohuni që të konsumoni mjaftueshëm proteina për të mbështetur rritjen dhe riparimin e muskujve”, ka thënë Hougen.
Ekspertët paralajmërojnë se ndryshimet duhet të bëhen gradualisht dhe pa teprime.
“Ngritja e peshave është e mirë, por më shumë nuk do të thotë gjithmonë më mirë”, ka thënë Dubinskaya.
Ajo ka theksuar se qëllimi nuk është të ngrini peshat më të rënda, por të ruani forcën dhe lëvizshmërinë për shumë vite.
“Shëndeti në moshën e mesme nuk ka të bëjë me ekstremet. Ka të bëjë me jetëgjatësinë. Synimi nuk është të ngrini peshën më të madhe në palestër, por të jeni ende në gjendje të ushtroni në mënyrë të sigurt edhe pas 20 vjetësh”, ka përfunduar ajo.