Studimet konfirmojnë se kortikosteroidet ulin numrin e vdekjeve tek të sëmurët rëndë me COVID-19

Trajtimi me kortikosteroide i pacientëve në gjendje kritike shkaku i COVID-19 e redukton për 20 për qind rrezikun e vdekjes, ka konstatuar të mërkuren një analizë e shtatë provave ndërkombëtare, duke e nxitur Organizatën Botërore të Shëndetësisë që të përditësojë këshillat e saja të trajtimit me këtë ilaç.

Analiza – që ka mbledhur të dhënat nga prova të veçanta të përdorimit të dozave të vogla të hidrokortizonit, deksametazonit dhe metilprednizolonit – ka gjetur se steroidet shkurtojnë numrin e pacientëve të vdekur në kujdesin intensiv në spitale, raporton Reuters, transmeton KOHA.

“Steroidet janë ilaç i lirë dhe në dispozicion dhe analiza jonë ka konfirmuar se ato janë efektive në reduktimin e vdekjeve tek të prekurit më të rëndë nga COVID-19”, ka thënë Jonathan Sterne, profesor i statistikave mjekësore në Universitetin Bristol të Britanisë, që ka punuar në këtë analizë.

Ai ka thënë se provat – e ndërmarra nga hulumtuesit në Britani, Brazil, Kanada, Kinë, Francë, Spanjë dhe SHBA – përçojnë një porosi të përbashkët, se ilaçet ishin efektive tek më të sëmurët, pavarësisht moshës apo gjinisë.