Nëse një rutinë e re del nga binarët, është e lehtë që të hiqni dorë plotësisht. Me një orar shumë më të ngjeshur, Brigid Delaney na mëson se si t’ia dalim në krye.
Rrallëherë rrugëtimi ynë shëndetësor dhe i fitnesit ndjek një vijë të drejtë. Zakonisht në javën e tretë të janarit, shprehitë e mira të filluara në ditët e para me shumë motivim dhe me energji të madhe të vitit të ri fillojnë të lëkunden.
Shumë arsye qëndrojnë prapa kësaj: kthimi në punë apo shkollë, kur keni diçka që ju shpërqendron dhe kur harroni pse ia keni nisur pikë së pari. Shtojani kësaj edhe pandeminë – që mund të ndodheni brenda një cikli të hyrje-daljeve nga izolimet apo edhe punën që mund të provojë të na kthejë përsëri në zyrë pas një kohe të gjatë – dhe bëhet edhe më vështirë që ta mbajmë një rutinë.
Këtë javë kam udhëtuar brenda shtetit, kam kaluar një javë me miqtë e mi dhe kam filluar një projekt të ri për punë, që të paktën për muajt e ardhshëm do të më marrë shumë kohë.
Është veç java e tretë e 2021-s dhe orari im veçse ka filluar të përballet me disa sfida. Këto lidhen më së shumti me ushqimin. Plani im ishte që të filloja regjistrimin e ushqimeve që haja në aplikacionin Vision Fitness dhe të kaloja një transicion nga ushqimet e shpejta, me kalori më të “pastra” dhe më të pakta. Kjo gjë nuk ndodhi. Isha shumë e zënë për t’i regjistruar të dhënat në aplikacion, ndonëse mundohesha të bëja zgjedhje më të mira kur haja.
Kjo më çoi buzë pyetjes: si t’i përmbahesha orarit kur isha shumë e zënë?
Mendësia: “Gjeni arsyen”
Kate James, trajnere e jetës dhe autore e librit “Change Your Thinking to Change Your Life” (Ndryshoni mënyrën e të menduarit për ta ndryshuar jetën), thotë se e rëndësishme është që të mbahet mend se “gjithçka ka të bëjë me ekuilibrin”.
Të qenët paksa të luhatshëm ose të vëmë në dyshim qëllimin tonë shëndetësor "është me të vërtetë e zakonshme për këtë periudhë të vitit, pas tri javësh", thotë ajo. “Ne mendojmë se nëse jemi duke i arritur qëllimet tona, mund të duket në njëfarë mënyre; po ushtroni çdo ditë, nuk po pini, vetëm po hani ushqim të shëndetshëm, por jeta ju pengon. Nuk do të jetë trajektore e drejtë”.
James këshillon që të “sillemi mirë me veten” dhe të mos e kritikojmë veten nëse çalojmë.
“Është shumë lehtë që të hiqni dorë krejtësisht – për shembull nëse nuk keni ushtruar çdo ditë. Shumë njerëz e kanë njëfarë mendësie se duhet ‘o krejt o fare’ dhe thonë: eh mirë, duhet t’u kthehem shprehive të vjetra”.
Në sesionin tim të parë personal me “Vision Fitness Bondi Junction”, trajnerja personale, Tania Drahonchuk, ka kaluar një orë duke më bërë një pyetësor të plotë shëndetësor, duke më peshuar dhe duke më skanuar në makinë “BioScan”, e cila mat moshën e funksionit të trupit tim (që është më e vjetër se mosha ime e vërtetë), masën muskulore (në fakt, mirë) dhe përqindjen e yndyrës trupore (ka nevojë për punë).
Seanca gërmoi thellë në motivim. Pse dua të jem në formë? Cila do të ishte arsyeja që t’u përkushtohem ushtrimeve të rregullta? Dhe nëse do t’u përkushtohesha ushtrimeve të rregullta, a do të mundohesha që gjithashtu ta ndryshoja dietën?
“Jam e përkushtuar!”, i kam thënë Tanias, pasi u tmerrova nga BioScan. Me disa taste, ajo më regjistroi në katër klasa për javën e ardhshme.
“Katër?!”. Por, Tania nuk do të më lërë të iki. E shikoj ditarin tim dhe e shoh që është e mundur që ta bëj këtë - thjesht duhet t’u jap përparësi ushtrimeve.
Në palestër fillova të bisedoja me një klient, Robin, i cili kishte humbur më shumë se 18 kilogramë vitin e kaluar. Ai ia atribuonte këtë regjistrimit të ushqimit në aplikacionin “Vision Fitness”, ushtrimeve të rregullta dhe motivimit personal.
Ai më tha se rutina e tij nuk ishte gjithmonë e përsosur - nëna e tij u sëmurë, u shfaq pandemia, iu desh të bënte shumë stërvitje nga shtëpia - por ia arriti qëllimit.
“Dikur kaloja afër McDonalds dhe thjesht hyja për një hamburger - dhe tani nuk kam ngrënë ushqim të shpejtë për një vit. Nuk do t’i prekja ato gjëra!”.
Kate Gregoreviq, geriatër dhe mjeke, si dhe autore e librit “Staying Alive”, thotë: “Të gjithë fillojmë të fortë, duke i bërë ndryshimet pozitive, por gjetja e ‘pse-së’ është çelësi i motivimit".
Për Robin, motivi ishte përmirësimi i lojës së golfit. Për disa nga klientët e Gregoreviqit, të cilët janë të moshuar, është “t’i ngjisin shkallët, të ngasin biçikleta, në thelb ta ruajnë pavarësinë për aq kohë sa të jetë e mundur”.
Rregullojeni orarin dhe jini fleksibil
Deri në javën e tretë kemi pasur mjaft kohë për shprehitë e reja të shëndetshme për të “parë se çfarë po funksionon - dhe çfarë nuk po funksionon”, thotë James. “Ndoshta të qenët të ashpër për diçka nuk funksionon. Pra, nëse vërtet dëshironi të hani ushqim të shijshëm të premten mbrëma, ecni më shumë të shtunën”.
Në rastin tim, ku udhëtimi po i shtynte planet e mia për të ngrënë shëndetshëm, sipas Jamesit duhet të përdoret një teknikë e quajtur “krijimi i mundësive”.
“Nëse keni një mendim negativ, të tillë si 'Unë do të jem në një Airbnb kështu që nuk mund të ushqehem shëndetshëm', mendoni se si ta krijoni mundësinë. Çfarë mund të bëni? Është shumë e lehtë që ta bëni një sallatë dhe të blini pak salmon në vend që të porosisni nga ‘Uber Eats’. Thjesht duhet t’i krijojmë mundësitë në mendjet tona”.
E kuptoj se suksesi i një shprehie të re është rezultat i përcaktimit të qëllimit, vendosjes së prioriteteve dhe bërjes së orarit, por gjithashtu duhet pasur edhe një plan rezervë, kur jeta krijon pengesa.
Përveç “gjetjes së arsyes”, duhet gjetur edhe kohë.
“Jam tifoze e madhe e planifikimit”, thotë Gregoreviq. “Duhet të përshtatet me jetën tuaj. Ndonjëherë mund të ushtroni vetëm 20 minuta - ushtrimet si ngritjet e peshave dhe ‘squats’-at - dhe do të mjaftonin”.
Gregoreviqi çdo javë harton orarin për ushtrimet e saj.
“Jam shumë e ngarkuar dhe mund të duket sikur nuk kam kohë”, thotë ajo. “Por mund t’i caktoj dy seanca në javë nga 30 deri në 40 minuta - herë me trajner e herë vetë – dhe i bëj edhe dy seanca të tjera trajnimi me intensitet të lartë”.
Veprimi: Blej një ditar dhe zotohu t’i kalosh 20 minuta çdo fundjavë, duke i planifikuar ushtrimet për javën e ardhshme.
