-
Përktheu:
Vita Abrashi-Kajtazi
- 29 gusht 2025 16:00
- Shpërndaje në:
Studiuesit që po zhvillojnë vaksina për trajtimin e kancerit kanë fituar qasje në një nga superkompjuterët më të fuqishëm të inteligjencës artificiale (AI) në Britani, ka raportuar BBC.
Ekipi nga Departamenti i Mjekësisë Nuffield në Universitetin e Oksfordit do ta përdorë superkompjuterin, i njohur si Dawn, për 10 mijë orë, në kuadër të një skeme qeveritare.
Ata do të analizojnë dhjetëra mijëra të dhëna të pacientëve me kancer për të identifikuar modele dhe lidhje të fshehura.
“Duket sikur ndonjë projekt ‘fantashkencor’ , por në fakt është realitet, jemi në vitin 2025, kjo teknologji ekziston dhe ne do ta provojmë”, ka thënë udhëheqësi i projektit, doktori Lennard Lee.
Duke shpjeguar përdorimin e superkompjuterit, ai ka shtuar se problemi kryesor me të cilin po përballen studiuesit është kompleksiteti i kancerit.
“Problemi me të cilin përballemi është se kanceri është jashtëzakonisht kompleks. Kjo na mundëson të përpunojmë sasi gjigante të të dhënave në një kohë shumë të shkurtër, në mënyrë që të shohim dhjetëra mijëra raste dhe të zbulojmë modele të fshehura. Ajo që na jep kjo është diçka me të vërtetë të veçantë, lidhet me shpejtësinë dhe shkallën e analizës”, ka thënë doktori.
Studiuesit po shpresojnë të bëjnë zbulime të reja, por edhe të kontribuojnë në Oxford Neoantigen Atlas, një platformë online me qasje të hapur që mbështet studimet për vaksinat kundër kancerit në Britani.
“Ne besojmë se do të arrijmë të hapim rrugën për të dizajnuar vaksina që më parë thjesht nuk kanë qenë të mundura”, ka thënë më tej doktori Lee, i cili është profesor i asociuar në Qendrën për Imuno-Onkologji në Oksford.