Cilat janë mitet më të mëdha për kancerin

Qysh në vitin 2016 shkencëtarët nga King's College në Londër dhe Universiteti Leeds e kryen një studim në 1,330 të rritur për ta monitoruar stilin e tyre të jetesës në lidhje me shëndetin (pirja e duhanit, konsumimi i frutave dhe perimeve, aktiviteti fizik) dhe i krahasuan bindjet e tyre për shkaqet e vërteta dhe të rreme të kancerit.

Rezultatet u publikuan kohët e fundit në European Journal of Cancer.

Lajmi i mirë është se vetëdijesimi për shkaqet e vërteta të kancerit është më i zhvilluar sesa vetëdijësimi për shkaqe mitike, por zhvillimi i përgjithshëm i vetëdijësimit është ende shumë i ulët. Vetëm 52% të shkaqeve të vërteta janë identifikuar në mënyrë të saktë.

Shumica e njerëzve u pajtuan se pirja e duhanit (88%), duhanpirja pasive (80%) ose djegiet nga dielli (60%) mund ta rrisin rrezikun prej kancerit, gjë që shkenca edhe e ka konfirmuar.

Më shumë shqetëson numri i rasteve në të cilat njerëzit besojnë se diçka po e shkakton kancerin edhe pse aktualisht nuk ka dëshmi të mira për këtë, transmeton Koha.net. Për stresin (43%), aditivët në ushqim (42%), frekuencat elektromagnetike (35%) dhe ushqimin OMGJ (34%) supozohet gabimisht se e shkaktojnë kancerin. Përveç kësaj, 19% e të anketuarve besojnë se furrat mikrovalore e rrisin rrezikun prej shfaqjes së kancerit, ndërsa 15% e të anketuarve të njëjtën gjë e mendojnë për pirjen nga shishet plastike.

“Është shqetësuese të shohësh se kaq shumë njerëz i miratojnë faktorët e rrezikut për të cilat në përgjithësi nuk ka asnjë dëshmi”, tha dr. Samuel Smith nga Universiteti në Leeds.

Edhe Lifestyle 5 muaj më parë Shtatë milionë raste të kancereve në vit janë të parandalueshme, sipas një raporti

“Krahasuar me studimet e mëparshme, duket se numri i njerëzve që besojnë në shkaktarë të pavërtetuar të kancerit megjithatë është rritur që nga fillimi i shekullit, gjë që do të mundë të jetë shkak i ndryshimeve në mënyrën e qasjes ndaj lajmeve dhe informacioneve përmes internetit dhe rrjeteve sociale”.

Ai gjithashtu tha se çfarë propozonte të bëhej për këtë çështje. “Është shumë e rëndësishme ta përmirësojmë edukimin publik në lidhje me shkaktarët e kancerit në qoftë se duam t’i ndihmojmë njerëzit të marrin vendime të informuara në lidhje me jetët e tyre dhe të sigurohemi që të mos shqetësohen pa nevojë”, shpjegoi ai.

Sipas autorëve të studimit, rreth gjysma deri një e treta e rasteve të kancerit mund të shmangen duke e ndryshuar mënyrën e jetesës, përcjell Koha.net. Kjo është rreth 1.1 milion raste të kancerit çdo vit në Evropë. Ndryshimet më të rëndësishme që dikush mund t’i bëjë, siç thonë autorët, janë ndërprerja e pirjes së duhanit, ruajtja e peshës së shëndetshme të trupit dhe shmangia e ekspozimit të tepërt ndaj rrezatimit UV.