Një grua kërkon prindërit, zbulon se u shit kur ishte foshnje

6-vjeçarja Jane Blasio po luante në oborrin e shtëpisë një pasdite kur jeta e saj ndryshoi rrënjësisht. Babai i saj, Jimi, i kërkoi të hynte në shtëpi sepse donte t’i thoshte diçka.

“Duhet të të themi diçka dhe mund të jetë e rëndë për ty ta kuptosh”, i tha ai Blasios dhe motrës së saj 11-vjeçare.

Më pas nëna e tyre, Joan, vazhdoi: “Ju të dyja jeni të birësuara. E kuptoni çfarë do të thotë kjo?”

Atë kohë, Blasio ishte pak e interesuar të kuptonte kuptimin e të qenit e birësuar. Por, vite më pas ajo kuptoi një të vërtetë krejt tjetër, shkruan People.

Dekadat e gjata të kërkimit të saj për të gjetur prindërit e vërtetë përfunduan në ekspozimin e të vërtetës së hidhur për të. Një doktor abortimi në Georgia, Thomas Hicks, drejtoi një operacion të paligjshëm të shitjes së foshnjave gjatë viteve 1950 dhe 1960.

Gjatë kërkimit zbuloi se ajo ishte në mesin e 200 fëmijëve të shitur përmes klinikës. Më vonë, ajo ndihmoi dhjetëra të tjerë që të gjenin prindërit e tyre.

Edhe Botë 22 kor 2026 Të birësuarit ndërkombëtarë nga Koreja e Jugut kërkojnë drejtësi, jo rikthim në atdhe

“Babai im e dinte (se veprimet e klinikës ishin ilegale), por nëna ime vetëm donte një fëmijë, asgjë tjetër. Kështu që babai im do të bënte çkado për ta bërë atë të lumtur”, thotë Blasio.

Para se Joan të vdiste, e kishte detyruar bashkëshortin e saj që të premtonte se do t’i tregonte Blasios gjithçka. Ajo çfarë mësoi nga babai i saj birësues e shokoi dhe e zemëroi atë.

“Prindërit e mi blenë një fëmijë në një mënyrë që nuk më lanë opsion tjetër përveç se të kërkoj e të mos gjej përgjigje. Kjo nuk është dashuri, ky është dëshpërim”, ka thënë ajo.