Një burrë nga Washingtoni, që mendoi se kishte fituar xhekpotin në lotari në vlerë 340 milionë dollarë, ka paditur “Powerballin” dhe Lotarinë e Washington DC, që pretendojnë se publikuan numrat e tij gabimisht, raporton “BBC”.
Kur z. Cheeks kishte paraqitur biletën në Zyrën e Lotarisë dhe të Lojërave (OLG), pretendimi i tij ishte refuzuar.
“Një nga agjentët më tha se bileta nuk është fituese dhe e hodhi në shportë”, thotë burri.
Por, z. Cheeks mori atë biletë dhe gjeti një avokat.
Ai tash po e padit lotarinë për dëme, në vlerë të xhekpotit të Powerballit, si dhe interesin, pra total rreth 340 milionë dollarë.
“Gabim aksidental”
Sipas dokumenteve gjyqësore, Powerball dhe një kompani e kontraktuar nga lotaria, “Taoti Enterprises”, kanë pretenduar se konfuziteti u krijua nga një gabim teknik.
Në dokumentet gjyqësore, një punonjës i Taotit ka thënë se më 6 janar të vitit 2023 – në ditën kur Cheeks solli biletën e tij – po bëheshin testime në uefaqe.
Në atë ditë, si test u shfaqën disa numra të Powebarll, që u përshtatën me ato të Cheeksit. Por, ato ishin vendosur “aksidentalisht” në uebfaqe, siç thuhet në dokumente gjyqësore. Ata numra qëndruan online për tri ditë, deri më 9 janar.
Por, sipas punonjësit të Taotit ata numra nuk ishin numrat që u tërhoqën në atë rund të lotarisë.
Cheeks ka ngritur tetë akuza, përfshirë thyerje të kontratës, neglizhencë, shkaktim të shqetësimit emocional dhe mashtrim.
Avokati i Cheeksit, Richard Evans, ka thënë në dokumente gjyqësore se pasi numrat fitues u përshtatën me ato të Cheeksit, atij i “takon xhekpoti i plotë”. Përndryshe, Evans tha se Cheeks duhet të dëmshpërblehet “për neglizhencë të madhe” nga lotaria duke vendosur numrat e lotarisë gabimisht.
Cheeks ka thënë se shpreson që “drejtësia të mbizotërojë”, ndërsa ka shtuar se fitimi i lotarisë do t’ia ndryshonte jetën atij dhe familjes së tij.
Seanca e radhës dëgjimore për rastin është e paraparë të mbahet më 23 shkurt.
